Futbol millimiz qoca Santuşla daha bir fiaskoya imza atıb

Futbol üzrə Azərbaycan millisi dünən portuqaliyalı qoça Fernandu Santoşun rəhbərliyi altinda daha bir uğursuz oyunu ilə öz pərəstişkarlarını meyus edib. AFFA-nın hələ də böyük ümid bəslədiyi qoca Santoşun "sehril" çubuğu bu dəfə də isə yaramayıb. Nəticədə də dünən millimiz "Liv Bona Dea Arena"da qəbul etdiyi Macarıstan yığma komandasına məğlub olub. Taleyi belaruslu referi Viktor Şimusikə həvalə edilən oyunda qonaq komanda qalib gəlib - 1:2. 

Hesabın erkən açıldığı bu matçın 5-ci dəqiqəsində macar futbolçu Barnabaş Varqa hesabı açıb - 0:1. Bundan iki dəqiqə sonra millimizin oyunçusu Renat Dadaşov pozulmuş statusu bərpa edib - 1:1. Matçda sonuncu və qələbə topunu 34-cu dəqiqədə qonaqlardan Dominik Soboslai vurub - 1:2.

Matçın taleyini də elə bu qol həll edib. Oyunda başqa qol vurulmayıb.

Bununla da, rəsmi oyunlar öncəsi iki yoxlama matçına çıxan Azərbaycan millisi bu dəfə də azarkeşlərinə qələbə sevinci bəxş edə bilməyib. Yeri gəlmişkən, bu, öz gəlişi ilə bizləri qələbəyə tamarzı qoyan Santusun rəhbərliyi altında yığmamızın 10-cu oyunu idi. Bu oyundan iki gün öncə isə millimiz Latviyada yerli komandaya qarşı oyunda meydanı qolsuz bərabərliklə tərk etmişdi.

Maraqlıdır ki, qarşıda daha çətin və rəsmi oyunları olan millimiz gerilədikcə, qoca Santuş inkişafdan danışır. O, bəlli oyundan sonra verdiyi açıqlamada belə deyib: -

"Biz oyuna pis başladıq və qapımızda erkən qol gördük. Lakin az sonra bunu qaydasına qoya bildik. Di gəl ki, daha sonra qapımızdan ikinci qolu buraxdıq. Matçın ikinci hissəsi bir qədər də çətin keçdi. Açıqi deyim ki, rəqib komandanın heyətində çoxlu sayda yüksək keyfiyyətli oyunçular vardi. Onlar heç də topu asanlıqla itirmək istəmirdilər. 

Düzdür, mənim oyunçularım matçın sonunadək məğlubiyyətdən yaxa qurtaracaqlarına inanırdılar. Matçın sonlarına yaxın isə üç dəfə fürsəti qaçırdıq. Bəzi oyunçularımda açıq-aşkar yorğunluq hiss edilirdi. Bunu nəzərə alaraq heyətdə dəyişikliklər etdim" - deyən baş məşqçi gülməli də olsa, meydanı məğlub durumda tərk edən futbolçuların çıxışından razı qaldığını bildirib və oyunçularının inkişaf etdiyini qeyd edib. 

İNTİQAM Məmmədov