Adalat Kerimov

Bəy, sizcə Putinin belə gücü varmı indi? Qorbaçovun hakimiyyətdəki son günlərini xatırladır.

Beybala Mirzeyev

Adalat Kerimov, xeyr, Putin artıq iki il əvvəlki qədər güclü deyil. Ukraynaya hücum etmək Putinin və Rusiyanın belini qırdı. Ancaq Putin xaraktercə o qədər kinli və toksik bir insandır ki, bu cür şəxslər hətta tamamilə zəifləyib sıradan çıxdıqları lap son ana qədər çevrəsindəkilərə zərər verməyə davam edirlər

Eldeniz Şamlı Abbaslı

Türkiyəni də dost ölkə saymır. Sadalanan siyahıda adı olmasa da.

Beybala Mirzeyev

Türkiyəyə qarşı ümumiyyətlə həddindən artıq qəzəblidir. Lakin Türkiyəyə qarşı hər hansı aqressiv addım atmağa nə gücü var, nədəki macalı. Çünki hazırda Ukrayna "bataqlığ"ında çabalamaqdadır.

Rovshan Huseynov

Sadəcə bu qəzamı,gərginliyə səbəb oldu?

QEYD. Başlıqlar "Facebook" sosial şəbəkəsindəki başlıqla eynilik təşkil edir.

Bəybala Mirzəyev: 

Putinin "ağ" və "qara" siyahısı...

Və yaxud, Kreml ölkəmizə qarşı hansı addımları atacaq?

Rusiya lideri ənənəvi olaraq hər ilin dekabrın son günlərində xarici həmkarlarını Yeni il və Milad bayramı münasibətilə təbrik edir. Bu dəfə də belə oldu. Belə ki, ötən gün (dekabrın 30-da) Kreml Putinin təbrik teleqramları göndərdiyi dövlət və hökumət başçılarının siyahısını dərc edib.

Mən o siyahını diqqətlə gözdən keçirdim. Həmin siyahını Vladimir Putinin dost və düşmən saydığı dövlət başçılarının siyahısı da adlandırmaq olar.

Sözügedən siyahıdan bir daha bəlli olur ki, Böyük Britaniya, Almaniya, ABŞ, Fransa, Yaponiya və s. ölkələr ənənəvi olaraq Rusiyaya dost olmayan dövlətlərin sırasında lap başda gəlir. Odur ki, sözsüz ki, Putin həmin dövlətlərin liderlərini təbrik etməyib.

Putinin təbrik etdiyi dövlət rəhbərlərinin siyahısında İlham Əliyevin adı birinci sırada gəlir. Daha sonra isə, Nikol Paşinyan, Aleksandr Lukaşenko, Kasım-Jomart Tokayev və digərlərinin adları əlifba sırası ardıcıllığı ilə qeyd olunub.

Biz bu sıyahıya əsaslansaq, Putinin İlham Əliyevi hələ də dost saydığını düşünə bilərik. Lakin əsl həqiqətdə isə bu belə deyil.

Prezident İlham Əliyevin dekabrın 29-da AzTV-yə verdiyi müsahibəsində Rusiya tərəfinin son davranışlarını sərt şəkildə tənqid etməsindən və vicdansızlıq kimi dəyərləndirməsindən sonra, Putinin Azərbaycanın və onun liderinin adını dost dövlətlər, dost liderlər siyahısında saxlaması mümkünsüzdür. Bu mənada onun İlham Əliyevə göndərdiyi təbrik məktubu da sadəcə görüntüdür.

Əsl həqiqətdə isə Putin bu günlərdə Əliyevə qarşı çox qəzəblidir. Çünki rusiyalı teleaparıcı və siyasi şərhçi Aleksey Luşnikovun sözləri ilə desək, Əliyev Putinlə tam Putinsayağı, yəni ki, Putinin öz üslubunda hərəkət etdi.

Və heç şübhəsiz ki, Əliyevin müsahibəsi Putini özündən çıxarıb. Çünki Əliyevin müsahibəsi sadəcə müsahibə deyildi. Bu müsahibədə həm ifşaedici bəyanat ovqatı, həm də haqlı ultimatum məzmunu vardı.

Əslində, Putin bunu gerçəkdən haqq etmişdi.

Ancaq biz eyni zamanda, Kremldəki qocanın həddindən artıq kinli siyasətçi olduğunu da yaxşı bilirik.

Ona görə də Putinin bundan sonra Rusiya-Azərbaycan münasibətlərini yeenidən nəzərdən keçirəcəyi və ölkəmizə qarşı təhdidlərə başlayacağı ehtimalı böyükdür.

Başqa sözlə desək, Rusiya-Azərbaycan münasibətləri bundan sonra tamamilə yeni müstəviyə keçəcək və Putin öz xislətinə, ənənəvi metodlarına sadiq qalaraq ən məkrli "ssenari"lərini işə salacaq, Əliyev və Paşinyana qarşı basqıları artırmaq üçün bütün mümkün resurslarını aktivləşdirəcək.

Onun Paşinyanla bərabər, Ermənistanın sabiq prezidentləri Robert Köçəryana və Serj Sərkisyana da təbrik teleqramları göndərməsinə də elə sözügedən "ssenari"lərin bir fraqmenti kimi baxmalıyıq.

Ümumiyyətlə, proseslərin gedişatı önümüzdəki qış günlərinin olduqca "qaynar" keçəcəyini göstərir. Biz Kremlin "qurşaqdan aşağı" zərbələrinə tam hazır olmalıyıq.

(ardı var)