COP29 Yaşıl Zonasında tədbirlər başlayıb

Azərbaycanın paytaxtı Bakıda keçirilən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının Yaşıl Zonasında tədbirlərə start verilib.

"Extreme Hangout" icma nümayəndəsi Ketrin Batli salamlama və açılış nitqi ilə çıxış etdi.

O, iştirak edən hər kəsə təşəkkür etdi və COP29-un əhəmiyyətini qeyd etdi: “Biz gənclərin iqlim dəyişikliyi ilə bağlı fikirlərini çatdırmaları üçün platforma təqdim etmək üçün buradayıq. Biz bunu bütün dünyada insanların kütlələrə maksimum təsir göstərməsi üçün etmək istəyirik. Qarşıdakı 11 gün ərzində çox mühüm hadisələr olacaq və biz bütün vacib məsələlərdə gənclərin səsini sizə çatdırmaq üçün səbirsizlənirik”.

COP29-da "Extreme Hangout" çərçivəsində növbəti tədbir Birləşmiş Millətlər Təşkilatının İqlim Dəyişikliyi üzrə Çərçivə Konvensiyası çərçivəsində çalışan aparıcı gənc iqlim liderlərini bir araya gətirən Gənc Danışıqçılar Akademiyasının COP29 Gənc Liderlik Forumu idi.

İclasın moderatorluğu "YNA Advocacy" direktoru Çarli Bevis olub. Tədbirdə ekoloji hüquq müdafiəçisi Enkhuun Byambadorj, fələstinli gənclərin iqlim müzakirəçisi Mohammed Usrof, BMT-nin iqlim və ətraf mühit üzrə gənclər nümayəndəsi Siqurd Seindal Krabbe və Poeziya layihəsinin yaradıcısı Beniamin Strzelecki çıxış edib.

Panel iştirakçıları nəsillərarası ədalət problemlərinin həllində və qlobal iqlim siyasətinin formalaşdırılmasında müxtəlif yanaşmaların necə kəsişdiyini, bir-birini necə təsir etdiyini və bir-birini necə tamamladığını müzakirə ediblər.

"Extreme Hangout" iqlim dəyişikliyi ilə mübarizə aparmağa kömək edən bilikləri, əlaqələri və əməkdaşlığı artırmaq üçün davamlılıq üzrə ən yaxşı təcrübələri bölüşmək və təsirli həllər tapmaq üçün düşüncə liderlərini və dəyişiklik yaradıcılarını bir araya gətirən qlobal iqlim dəyişikliyi icması və platformasıdır.