Beyləqanda şəhidin il dönümündə izdiham yaşanıb

Sentyabrın 21-i Beyləqan rayon Qəhrəmanlı kəndinin şəhidi Bəhruz Rüstəmlinin şəhadətə ucaldığı gündür. Şəhadətindən 1 il ötən qəhrəman antiterror əməliyyatları zamanı şəhid olub və doğulduğu kəndə Şəhidlər Xiyabanında dəfn olunub. Anası Sevinc xanım iki oğul övladını tək böyütmüşdü. Hər iki övladı hərbiçi olub Vətənə xidmət edirdi. Sevinc xanım özü də uzun illərdir ki, hərbi hissədə aşbaz işləyir. Min bir çətinliklə böyütdüyü övladı bir neçə müharibədə iştirak edib qələbə sevinci ilə qayıtsa da, antiterror əməliyyatlarından geri qayıtmaq qismət olmayıb.

Şəhadətindən bir il ötən şəhidimizin il dönümünə yüzlərlə insan axın edib. Məzarının önündə izdiham yaşanıb. Müxtəlif bölgələrdən şəhid ailələri, jurnalistlər, məktəblərin müəllim və şagird kollektivi, hərbiçilər, qazilər bir sözlə şəhidsevərlər şəhidin il dönümündə iştirak ediblər. Qəhrəman şəhidin qonaqlarından biri olan şairə Esmira Günəş tədbirin idarəçiliyini edərək şəhid anasını bir an belə tək qoymayıb. Çıxışında bildirib ki, Bəhruz Rüstəmli şairənin bir neçə kitabının qəhrəmanıdır və doğma qardaş qədər əzizdir onlara.

İlk öncə şəhidin məzarı ziyarət olunaraq məktəblilər şeirlər səsləndirilib, qonaqlar çıxış edib, daha sonra isə hər kəs şəhidin evində təşkil olunan ehsan süfrəsinə dəvət olunublar.

Gecə saatlarına qədər şəhid ailəsini ziyarət edənlər olub. Şəhidin anası gələn qonaqları, yaşanan izdihamı gördükcə təsəlli tapıb, qəhrəman oğlu ilə hər an qürur duyduğunu dilə gətirib. Və bildirib ki, belə bir oğul bir də dünyaya çətin gələ.

Esmira Günəş