Avropanın üç aparıcı ölkəsi – Fransa, Almaniya və Böyük Britaniya ilə Cənubi Qafqazın üç ölkəsi – Azərbaycan, Ermənistan və Gürcüstan arasında münasibətlər yeni çalar qazanmaqda və get-gedə daha açıq mübarizə müstəvisinə keçməkdədir.

Böyük Britaniya ənənəvi olaraq həmişə Azərbaycana meylli olub. Fransa və Almaniya isə bir qayda olaraq İrəvan və Tiflisi dəstəkləyib. Bunu son 100 ilin siyasi tarixindən də görmək mümkündür. Və sözügedən konfiqurasiya bu gün də dəyişməz olaraq qalır.

Belə ki, Almaniyanı və Avropa İttifaqının (Ai) digər üzvlərini də yanına alan Fransa hazırda birmənalı şəkildə ermənipərəst siyasət yürüdərək Azərbaycanın üzərinə gəlir. Və bu zaman Gürcüstanı da Aİ üzvlüyü ilə şirnikləndirərək Azərbaycan və Türkiyədən uzaqlaşdırmağa çalışır.

Çox təəssüf ki, ABŞ da “Azərbaycan Ermənistana hücum etməyə hazırlaşır” feyk-iddiasının üzərindən anti-Azərbaycan kampaniyasını qızışdıraraq bizi təhdid edir.

Başqa sözlə desək, hazırda Qərbin bütün yırtıcı köpəkləri Azərbaycana qarşı dişlərini qıcayıb durur.

Və məhz belə bir kritik məqamda dövrəyə İngiltərə girir.

Bu həftə Böyük Britaniyanın Avropa işləri üzrə dövlət naziri Leo Dokerti əvvəlcə İrəvana və sonra isə Azərbaycana səfər etdi.

Dokerti bu səfəri ilə həm Qərbin “oyuncağ”ına çevrilmiş Ermənistana, həm də Fransa və ABŞ-a açıq şəkildə mesaj verdi ki, Azərbaycan tək deyil və İngiltərə Cənubi Qafqazdakı (Azərbaycan və Gürcüstandakı) iqtisadi, siyasi maraqlarını kimsəyə güzəştə getməyə hazırlaşmır.

İngilis nazir Qərb siyasətçilərinə bir həqiqəti anlatmağa çalışır: Cənubi Qafqaz Avropanın təhlükəsizliyi və çiçəklənməsi üçün həlledici həlqədir, ona görə də bu bölgəni öz məhəlli maraqlarınızdan ötrü "barıt çəlləyi"nə çevirməyin!

Bir sözlə, L.Dokerti İrəvana Paşinyanın ipini çəkməyə, Vaşinqton və Parisə isə həddini göstərməyə gəlmişdi. Necə deyərlər, London ənənəvi rəqiblərini ram etməyin, susdurmağın yollarını yaxşı bilir.

Və Azərbaycana qarşı emosional demarşa start verən Paris və Vaşinqtondan fərqli olaraq London praqmatik əsaslarla, soyuqqanlı hərəkət edir. Onun Cənubi Qafqaza səfər edib məsələləri kulislər arxasında təmkinlə müzakirə edərək çözməsi də ənənəvi ingilis diplomatiyasının avantürist fransız və çılğın amerikan diplomatiyasından bir addım öndə olduğunu göstərir.

Odur ki, Dokertinin bu səfərindən sonra Cənubi Qafqazda sular bir xeyli durulacaq. ABŞ və Fransa Cənubi Qafqazdakı fəaliyyətlərini rəsmi Londonun maraqları ilə uzlaşdırmalı olacaq.