Kanada Ukraynaya zirehli texnikasını Rusiyada istifadə etməyə icazə verib

Kanada Ukraynaya Rusiya ərazisinə hərbi yardım çərçivəsində ötürülən tank və zirehli maşınlardan sərbəst istifadə etməyə icazə verib.

Bu barədə Kanadanın CBC telekanalı ölkənin Milli Müdafiə Nazirliyinin bəyanatına istinadən məlumat yayıb.

"Ukraynalılar vətənlərini necə müdafiə edəcəklərini daha yaxşı bilirlər və biz onların potensialını dəstəkləməyə hazırıq" deyən departament sözçüsü Kanadanın Ukraynaya tədarük edilən hərbi texnikanın istifadəsinə coğrafi məhdudiyyətlər qoymadığını qeyd edib.

Şərh hərbi ekspertlər arasında Ukraynanın Rusiyanın Kursk bölgəsində hücumunu nə qədər davam etdirə biləcəyi ilə bağlı müzakirələr fonunda verilib.

Bundan əvvəl Ottava Kiyevə səkkiz Leopard 2A4 tankı, onlarla zirehli döyüş dəstək maşını və yüzlərlə zirehli patrul maşını, həmçinin 155 mm çaplı M-777 yedəkli haubitsasını təhvil verib.

Avqustun 15-də CNN telekanalı kanadalı senatorun zirehli avtomobilinin Ukraynanın Rusiya ilə sərhədini keçməsinin görüntülərini dərc edib.

Xatırladaq ki, Ukrayna Silahlı Qüvvələri avqustun 6-da Rusiya Federasiyasının Kursk vilayətində genişmiqyaslı hücuma başlayıb. Bununla əlaqədar avqustun 9-dan Belqorod, Bryansk və Kursk vilayətlərində antiterror əməliyyatı rejimi tətbiq edilib. Kursk vilayətinin qubernatoru vəzifəsini icra edən Aleksey Smirnov 120 mindən çox insanın təxliyə edildiyini və ya bölgəni tərk etdiyini bildirib.