Tahir Süleymanov: 

AFFA-ya iddialı qüvvələr ciddi düşünməlidir

Milli komandaya baş məşqçi seçim(lər)i ilə bağlı AFFA-da İşçi Qrupu yaradılıb. Bu, iş çiyliyinin əyani təzahürü, məqsədli gedişləri, İşçi Qrupu adı altında bəlli qrupun sükanı əldə saxlamaq cəhdidir. Tərkibə nəzər yetirək:

1. Elşad Nəsirov - v.-prez./İc. Kom. üzvü

2. Vaqif Sadıqov - v.-prez./İc. Kom. üzvü

3. Sərxan Hacıyev - baş katib

4. Elxan Səmədov - PFL prez.

5. Zaur Axundov - İc. Kom. üzvü

Müqaviləsi bitmiş(!) De Byazinin məsələsi ilə bağlı AFFA İcraiyyə Komitəsinin, futbol ictimaiyyətini sakitləşdirməyə yönələn və tələm-tələsik keçirilən toplantı ilə bağlı fikirlər çox bildirilib. Təkralığa ehtiyac yoxdur, sakitliyi təmin etməklə yanaşı manevr etmək, vaxt udmaq imkanları qazanıldı...

Federasiyada idarəçilik çatları əmələ gəldiyi üçün, Icraiyyə Komitəsi yekdil qərar qəbul edə bilmir. İllərdi kor-koranə əl qaldıranlar əl qaldırmaq istəmir artıq. Bu, futbolu düşünmək anlamına gəlməməlidir, özlərini qorumaq, sabah Bakı küləyinin hansı istiqamətə əsəcəyi "mövqe"yi düşüncəsidir.

Kabinet oyunlarında pərgar olan dağıdıcı qrupa sərf edilən, yerində həlli mümkün olmayan məqamda İşçi Qrupunun yaradılması qərarı sonradan növbəti həmlə ilə müdaxilələrə şərait yaradır. Toplantıdan sonra açıqlama: - "İşçi Qrupunun tərkibi İK üzvləri ilə yanaşı kənardan da nümayəndələrlə formalaşdırılacaq".

Reallıq fərqli mənzərə yaradır və açıq hiss olunur ki, namizədlər "seçimində" çox düşünülüb". İşçi Qrupuna "kənar"dan cəlb edilənlər Sərxan Hacıyevlə, Elxan Səmədovdur. AFFA sistemində baş katib tarixən, bu tipli məsələlərdə, vəzifəsinə uyğun, ən azı əlaqələndirici rol oynayır/oynamalıdırsa, PFL prezidentinin milli komanda seçimlərinə nə aidiyyatı var?! Yəqin ki, ehtiyac duyulsa, ölkə futbolunun inkişafı naminə Məşqçilər və Klublar komitələri də öz qızıldan qiymətli təkliflərini İşçi Qrupuna təqdim edəcəklər.

İşçi Qrupunun tərkibi nəyi göstərir? İdeoloji mərkəz tərəfindən İK ofsayda salınıb, özlərinə sərfəli minimum 3 üzv qrupda yer alır. Futbol klanına daxil olan, hələ ki, Fransadan Azərbaycana qonaq, FİFA nümayəndə heyətinin üzvü qismində təşrif buyuran Elxan Məmmədov İşçi Qrupunda üstünlük qazanıb artıq. Digər üzvlər isə, bilərəkdən/bilməyərəkdən

labirintə, tələyə salınıb. Əvvəlki illərdə baş məşqçi seçimləri ilə baş katiblikdən şablon cavab verilirdi:-"Bu məsələlər Icraiyyə Komitəsinə aiddir". İndi isə, azlıqda qalan, səsvermədə üstünlük qazanmaq şansları belə olmayan Sərxan Hacıyev və Elxan Səmədov, bu manevrdən məqsədli şəkildə məhrum edilib. Onsuz da İK toplantılarında daimi "səs"sizliklə iştirak edən baş katib, PFL prezidenti oyuna salınıb. Prinsipiallıq nümayişi və ya kimlər üçünsə "oyunçu" rolunu oynayacaqlarını zaman göstərəcək...

Bataqlığa sürüktlənmiş Azərbaycan futbolunun strateji/faktiki qalaq-qalaq yığılmış problemləri başdan aşdığı vaxtda, bu "oyun"ların məqsədi/məramı nədir? Növbəti Hesabat-Seçki Konfransına sayılı aylar qalıb. Getdikcə iddiaçılar kövrək addımlarla üzə çıxmağa, görünən/görünməyən təbliğat mexanizmini işə salmağa çalışırlar. Unutmamalıdırlar, əks tərəfdə, illəri bir-birinə calayan "qurdlar vadisi"dir. Nisbi zəifləsələr də, sona kimi "silahı" yerə qoymayacaqlar.

Zəifləmişlər qarşısındakıları o qədər zəif bilirlər ki, çox bəsit gedişlər edilir. "Birinci sinif" səviyyəsində atılan addımlar indiki durumu şərtləndirir. AFFA-ya iddialı qüvvələr ciddi düşünməlidir. Tək səlahiyyət, vəzifə, imkanlar yetərli deyil. Qarşı(nız)da təcrübəli kabinet oyunçuları mövcuddur. Futbolu oynaya bilməsələr də, belə "oyunlarda" ustadırlar. Qarşılarında daha zəif rəqiblər gördükdə, daha da qızışırlar. Kimlərsə bir sərəncamla məsələlərin həll ediləcəyini düşünürsə - yanılır.

Tələm-tələsik baş məşqçi seçimi nəyə/kim(lər)ə sərf edir? Birmənalı olaraq, futbol düşünülmür. Federasiyada strateji post uğrunda çarpışma, konfransöncəsi nüfuz, mövqe savaşı, yaxın gələcəyə hesablanan futbolətrafı mübarizədir. "Köhnə"lər AFFA-da önəmli vəzifələri itirəcəyi halda belə, "yeni"lərin rəhbərliyi dövründə milliyə təsir qüvvəsini saxlayıb çökdürərək, təzə gələnləri tilova salmaq düşüncəsidir. Hazırda bu mərhələ gündəmdə deyil, məqsəd, mövcud "rıçaq"ları əldə saxlayıb AFFA-nı özləri üçün qorumaqdır.

İddiaçılar geniş imkanlara malik olsalar da, ideoloji/strateji baxımdan, hələ ki, uduzurlar.

Bir tərəfdən, tam görünməsələr də, qüvvələrin çoxluğu, futbol yox, qrup maraqları, pərakəndəlik, idarəçi təcrübəsizlik, niyyət fərqliliyi, digər tərəfdən, nəinki ümumi vahid komandanın, ayrı-ayrılıqda beyin mərkəzlərinin

olmaması və ya aldadıcı, əmr formatlı, güvənc, arxayınlıq.

Arif Əsədovun milli komanda ilə gələn ilin mart ayına kimi müqaviləsi qüvvədədir. Rəsmi oyunlar yox, məsuliyyət yox, namizəd futbolçulara müvəqqəti nəzarət, seçim problem yarada bilməz. Futbolda, AFFA-da, kənarda başlar baş məşqçi seçimlərinə yox, konfransa hazırlığa yönəlməlidir. İşçi Qrupu, milli müzakirələri tupik/dalan, vaxtın itirilməsi, illərdi futbolu dağıdan ideoloji qrupa xidmət etməkdir. Ayıq olun ki, aylardan sonra top əvəzi Aya baxılmasın. Əgər niyyətlərdə Azərbaycan futbolu düşünülürsə... Əks halda futbola/AFFA-ya kimlərin gəlib, kimlərin gedəcəyinin heç bir fərqi yoxdur/olmayacaq!