Bəybala Mirzəyev:

Haylar və farslar sevinməyə tələsməsinlər…

İlham Əliyevin bir neçə gün öncə Misirə səfəri zamanı səsləndirdiyi “Müstəqil Fələstin dövləti qurulmalıdır, Şərqi Qüds onun paytaxtı olmalıdır. Bu gün Qəzzada yaşanan faciə tezliklə dayandırılmalıdır, müharibə dayandırılmalıdır və bütün məsələlər danışıqlar yolu ilə həll olunmalıdır” bəyanatına görə özünə əl qatan və süni ajiotaj yaradan Ermənistanın ekspert camiəsi və media qurumları, nədənsə, ötən gün İrəvanın mərkəzindəki sinaqoqa qarşı törədilən vandalizm aktına münasibət bildirməkdən, bu iyrənc hərəkəti pisləməkdən yayınır.

Onlar 2020-ci ilin payızında (44 günlük müharibə dönəmində) İrəvandakı yəhudi abidəsinə qarşı törədilən vandalizm hadisəsinə də reaksiya verməkdən boyun qaçırmışdılar. Həmçinin, 2023-cü ilin 6 oktyabr və 15 noyabr tarixlərində İrəvandakı sinaqoqa qarşı vandal hücumların həyata keçirilməsinə də susmuşdular.

Bax, budur erməni siyasi elitasının və erməni media mənsublarının gerçək siması (daha doğrusu, simasızlığı).

Bir yəhudi sinaqoquna və ya yəhudi heykəlinə hücum onların vicdanını əsla tərpətmir. Lakin rəsmi Bakı Fələstinlə, Qəzza ilə bağlı mövqeyini bildirən kimi erməni politoloqları, ictimai-siyasi xadimləri və erməni KİV-i qarğa-quzğun sürüsü kimi dərhal tökülüşüb saxta təəssübkeşlik donuna büründülər, İsrailin simpatizanları kimi çıxış etməyə, Azərbaycanın guya İsraildən üz döndərib Fələstini, HƏMAS-ı dəstəklədiyini iddia etməyə başladılar.

Hərçənd ki, hər kəs bilir ki, rəsmi Bakı Ermənistandan və İrandan fərqli olaraq heç vaxt HƏMAS-ın fəaliyyətlərini təqdir etməyib və bu gün də dəstəkləmir. Burada söhbət HƏMAS kimi terror təşkilatını dəstəkləməkdən yox, yalnız və yalnız Fələstin xalqının BMT qətnamələrinə uyğun olaraq öz dövlətini qurmaq hüququnu dəstəkləməkdən gedə bilər ki, rəsmi Bakı da məhz bu hüququ dəstəkləyir, vəssalam.

Və bu hüququ təkcə Azərbaycan yox, dünyanın əksər dövlətləri, o cümlədən hətta İsrailin ən yaxın müttəfiqi sayılan ABŞ da dəstəkləyir. Ona görə də bu gün ermənilərin yəhudilərə saxta canıyananlıq göstərib Azərbaycanı İsrailin düşməni, ərəblərin dostu kimi təqdim etməyə çalışmaları açıq-aşkar riyakarlıq və siyasi fahişəlikdir.

Azərbaycanın Fələstin xalqının müstəqil dövlət qurmaq hüququnu müdafiə etməsi, onun İsrail ilə dostluq və əməkdaşlığa son qoyması kimi başa düşülməməli və ya təqdim edilməməlidir. Məsələni bu formada təqdim edənlər qərəzli qüvvələrdir. Onlar qəsdən belə edirlər. Bu qüvvələrin məqsədi Azərbaycanla İsrailin arasını vurmaqdır. Bu mənada ermənilərin də, İranın anti-Azərbaycan mövqeli təhlilçilərinin və jurnalistlərinin də əlinə girəvə düşüb.

Bu fürsətçilər, bu şər qüvvələr Fələstin xalqının öz dövlətini qurmaq hüququnu tanıyan ABŞ, İngiltərə, Almaniya, İspaniya, Norveç kimi ölkələrin ünvanına bir kəlmə də olsun tənqidi fikir səsləndirmədikləri halda, nədənsə, yalnız məhz Azərbaycanı hədəfə alıblar. Bu da onu göstərir ki, ortada İsrail və Azərbaycanı bir-birinə düşmən etmək kimi olduqca çirkin plan var.

Lakin farsların da, hayların da bu arzusu gözlərində qalacaq. Bizim dövlətlərimiz iki şər qonşumuzun hiyləsi ilə uzun illərin dostluğuna və müttəfiqliyinə son qoyası deyil. Ona görə də haylar və farslar sevinməyə tələsməsinlər!

Azərbaycan İsrail ilə indiyə qədər necə sıx dostluq və əməkdaşlıq edibsə, bundan sonra da bu xətti davam etdirəcək. Fələstin xalqının dövlətə sahib olma hüququnu dəstəkləməyimizlə İsraillə dostluq və müttəfiqliyimiz əsla bir-birini inkar etmir. Əksini düşünənlər şərə xidmət edənlərdir.