Rusiya-Ukrayna müharibəsində 91 media nümayəndəsi həlak olub

Ukraynada münaqişənin gərginləşməsi nəticəsində 91 media nümayəndəsi həlak olub, daha 30 nəfər isə əsirlikdədir.

Bu barədə məlumat Ukraynanın mədəniyyət və informasiya siyasəti naziri Rostislav Karandeyev bildirib.

“Döyüş mövqelərində və arxa cəbhədə hadisələr baş verən yerdə jurnalistlər son dərəcə vacib bir missiyanı yerinə yetirirlər - Rusiya-Ukrayna müharibəsi hadisələrini lentə alır və dünyaya operativ, həqiqətə uyğun məlumat çatdırırlar. Düşmənlə mübarizəmizə, ictimai rəyin formalaşmasına və demokratiyanın möhkəmlənməsinə verdiyiniz töhfəyə görə ukraynalı jurnalistlərə və xarici KİV nümayəndələrinə səmimi təşəkkürümü bildirirəm”, - Karandeyevin Jurnalistlər Günü münasibətilə təbrikində deyilir.

O qeyd edib ki, jurnalistlərin əməyini qiymətləndirmək olmaz, çünki onun nəticələri tarixin gedişatını dəyişdirə biləcək mühüm mesajlar daşıyır.

“Rusiyanın təcavüzü ucbatından təəssüf ki, bu gün Ukrayna ən qiymətli sərvəti olan xalqını itirir. Onların arasında jurnalistlər və media mütəxəssisləri də var. NUJU-nun məlumatına görə, Rusiyanın Ukraynaya genişmiqyaslı işğalı zamanı 91 media nümayəndəsi həlak olub. Dövlətimizin azadlığı naminə onların şücaətləri qarşısında baş əyirik”.

Bundan başqa, onun sözlərinə görə, hazırda 30 media nümayəndəsi əsirlikdədir və yüzlərlə insan Silahlı Qüvvələrin sıralarında vətənini müdafiə edir.