Zakir İbrahimov: “AzerGold” QSC-nin ümumi gəliri 1 milyard 232 milyon manatı ötüb”

“Ölkəmizin dağ-mədən sənayesini təmsil edən “AzerGold” QSC qeyri-neft-qaz sektorunun ümumi daxili məhsulda çəkisinin artırılması, ölkəmizin ixrac potensialının yüksəldilməsi istiqamətində fəaliyyətini uğurla davam etdirir. Sözügedən sektor üzrə ixracatçı dövlət subyektləri sırasında lider mövqelərdə qərarlaşan “AzerGold” bugünədək 412 min unsiya qızıl (12,8 ton), 785 min unsiya gümüşün (24,4 ton) ixracını həyata keçirib. Əlavə olaraq, yerli bazarda 15 min unsiya (0.5 ton) qızıl və 100 min unsiya (3.1 ton) gümüş realizə edilib. Bu əməliyyatlar nəticəsində əldə edilən ümumi gəlir 1 milyard 232 milyon manatı ötüb”. 
Bu sözləri “AzerGold” QSC-nin İdarə Heyətinin sədri Zakir İbrahimov İçərişəhərdə Azərbaycanda zərgərlik sənəti və numizmatika nümunələrinə həsr edilən “Xəzinə” muzey ekspozisiyasının açılış mərasimində çıxış edərkən deyib.
“AzerGold” QSC-nin ölkəmizin dağ-mədən sənayesinin inkişafı istiqamətində fəaliyyətindən danışan Z.İbrahimov qeyd edib ki, şirkətin hasilat və istehsal fəaliyyəti fonunda yerli icmalarla iş, ətraf mühitin mühafizəsi, sosial-iqtisadi inkişaf kimi vacib sahələrə davamlı töhfələrin verilməsi də əsas məqsədlərimiz sırasına daxildir.  
İdarə Heyətinin sədri Səhmdar Cəmiyyətin fəaliyyətinin müasir dövrün çağırışlarına, yerli və beynəlxalq qanunvericiliyə uyğun olaraq təşkil edildiyini vurğulayıb. Onun sözlərinə görə, QSC tərəfindən yaşıl iqtisadiyyat, rəqəmsal transformasiya, innovativ həllərin tətbiqi, ekosistemin gücləndirilməsi istiqamətində bir sıra addımlar atılır və gələcəkdə də bir sıra yeniliklər nəzərdə tutulur.

X X X

Zakir İbrahimov: “Mədəni irsimizin təbliği məqsədilə hazırlan qızıl sikkələr “AzerGold” üçün əlavə gəlir mənbəyi formalaşdırıb”

“Qiymətli məhsulların daxili bazarda pərakəndə satışı üzrə layihənin əsas məqsədi milli-mədəni irsimizin təbliği olsa da, məhsullarımız eyni zamanda sərfəli yatırım aləti kimi də böyük marağa səbəb olub. Yerli qızıl və gümüşdən hazırlanan sikkə və külçələrin pərakəndə bazarda özünü kifayət qədər doğrultması Səhmdar Cəmiyyət üçün zamanla əlavə gəlir mənbəyi formalaşdırıb və 2021-ci ildə ilk Satış və mübadilə mərkəzinin yaradılmasına zəmin yaradıb”. 
Bu sözləri “AzerGold” QSC-nin İdarə Heyətinin sədri Zakir İbrahimov İçərişəhərdə Azərbaycanda zərgərlik sənəti və numizmatika nümunələrinə həsr edilən “Xəzinə” muzey ekspozisiyasının açılış mərasimində çıxış edərkən deyib.
İdarə Heyətinin sədri bildirib ki, İqtisadiyyat Nazirliyinin təşəbbüsü ilə milli zərgərlik bazarının inkişafı istiqamətində həyata keçirilən islahatlara əlavə dəstək məqsədilə yaradılan Satış və mübadilə mərkəzinndə qiymətli məhsulların satışı, qızılın dünya birjasındakı cari qiymətinə uyğun gerialışı – mübadiləsi təmin edilir, beləcə yerli bazarın tələbatının keyfiyyətli şəkildə ödənilməsi istiqamətindəki fəaliyyətimizə mühüm töhfə verilir”.
Qeyd edək ki, “AzerGold” QSC tərəfindən Azərbaycan qızılı və gümüşündən müxtəlif dizaynlarda sikkələr, eləcə də qızıl külçələr ilk dəfə 2018-ci ildə istehsal edilib, 2019-cu ildən yerli pərakəndə satış bazarına təqdim edilib. Məqsəd ölkəmizin qiymətli metallar bazarının inkişafına təkan vermək və pərakəndə satışı stimullaşdırmaqdır.  
Müxtəlif çəkilərdə, ən yüksək – 999.9 əyarda  hazırlanan qızıl və gümüş sikkələr, eləcə də qızıl külçələr “AzerGold” QSC-nin Bakı şəhəri, Bülbül prospekti 3 ünvanında yerləşən Satış və mübadilə mərkəzində və onlayn satış platforması - “www.azergold.gift” vasitəsi ilə alıcılara təqdim edilir.