Ağdamda Ulu Öndər Heydər Əliyevin anadan olmasının 101-ci ildönümü münasibətilə konsert proqramı keçirilib

07 may 2024-cü il tarixində Ağdam rayonunda Ulu Öndər Heydər Əliyevin anadan olmasının 101-ci ildönümü münasibətilə konsert proqramı təqdim edildi.

Ağdam rayonunun Muğam Mərkəzində Əməkdar artist, dirijor Fuad İbrahimovun rəhbərliyi altında Bakı Kamera  Orkestrinin (bədii rəhbəri SSRİ Xalq artisti, professor Fərhad Bədəlbəyli, direktoru Azərbaycan Respublikasının Xalq artisti, professor Yeganə Axundova, baş dirijoru isə Azərbaycan Respublikasının Əməkdar artisti Fuad İbrahimov) müşayiəti və Azərbaycanın xalq artistləri Nəzakət Teymurova, Aygün Bayramova, Əməkdar artistlər Firuz Səxavət, Səbuhi İbayevin ifaları ilə Ümummilli Lider Heydər Əliyevin anadan olmasının 101-ci ildönümünə həsr edilmiş konsert keçirildi.

Tədbirdə Ağdam Rayon İcra Hakimiyyətinin başçısı Vaqif Əsədov, hüquq mühafizə orqanlarının, idarə müəssisə və təşkilatların rəhbərləri və rayon ictimaiyyətinin nümayəndələri iştirak etdilər.

Tədbirdə Azərbaycan Respublikasının Dövlət Himni səsləndirildi, ölkəmizin ərazi bütövlüyü və suverenliyi uğrunda şəhid olmuş vətən övladlarının və Ulu öndər Heydər Əliyevin əziz xatirəsi bir dəqiqəlik sükutla yad edildi.

Tədbirdə çıxış edən Ağdam Rayon İcra Hakimiyyətinin başçısı Vaqif Əsədov Azərbaycan xalqının ümummilli lideri Heydər Əliyevin həyat və fəaliyyəti, onun Azərbaycan tarixindəki rolu barədə geniş məlumat verərək bildirib ki, müasir Azərbaycan dövlətinin memarı, ümummilli lider Heydər Əliyevin müstəqilliyimizin qorunub möhkəmləndirilməsində, demokratik hüquqi dövlət quruculuğunun inkişafındakı müstəsna rolu və misilsiz xidmətləri  xalqımız tərəfindən daim uca tutulur, əziz xatirəsi dərin ehtiramla anılır.

Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir.

Konsert proqramında tanınmış musiqiçilərin səsləndirdiyi musiqi nömrələri iştirakçılar tərəfindən böyük coşqu ilə qarşılandı.

Sonda isə xatirə şəkilləri çəkdirildi.