Qadın basketbol yığmamız Paris Olimpiadasına lisenziya qazanıb

Millimiz finalda Polşa komandasından üstün olub

Aprelin 12-də Honqkonqda qadınlar arasında 3x3 basketbolu üzrə startı verilən və Azərbaycan komandası da daxil olmaqla 8 millinin mübarizə apardığı Olimpiya Təsnifatli turnirə bu gün həlledici final qarşılaşması ilə yekun vurulub. Paris -2024 Olimpiya Oyunlarında iştirak etmək hüququ verən yeganə lisenziya uqrunda keçirilən bu turnirin həlledici final matçında Azərbaycan yığması ilə Polşa komandası üzləşib. Görüş olduqca gərgin mübarizə şəraitində keçib. Matçın əvvəlində polşalılar hesabda irəlidə olsa da matçın əsas hissəsi bərabər sonluqla bitib - 16:16. Əsas vaxtdan sonra Azərbaycan yığması reqlamentə uyğun olan iki xalı daha tez qazanaraq 18:17 hesablı qələbəyə nail olub. Bu qələbə ilə Azərbaycan millisi Paris-2024 Olimpiadasına lisenziya əldə edib.

Xatırladaq ki, heyəti Dina Ulyanova, Tiffat Heys, Aleksandra Mollenxauer və Mersedes Uolkerden ibarət olan milimiz yer aldığı B qrupunda əvvəlcə Cilini 17:14, ardından Monqolustan komandasını 13:12 hesabla məqlub etdikdən sonra Hollandiyaya uduzub - 12:15. Bu nəticə ilə qrup ikincisi olaraq yarımfinala yüksələn millimiz burda isə Macaristan yığmasından üstün (21:19) olaraq finala yüksəlib.

Qeyd: Daha bir Olimpiya Təsnifatli turnir may ayında Macarıstanda keçiriləcək. 

İNTİQAM Məmmədov