Suzuki zavodu uçan avtomobillərin istehsalına başlayır

Yaponiyada Suzuki və Skydrive uçan avtomobillərinin istehsalına başlanılır.

Skydrive şirkəti Yaponiyadakı Suzuki zavodunda SD-05 uçan avtomobilinin (eVTOL) istehsalına başlandığını elan edib.

Bu barədə martın 7-də şirkətin mətbuat xidmətinin yaydığı məlumatda deyilir.

İvata şəhərindəki müəssisənin istehsal gücü ildə 100 uçan avtomobildir. Skydrive uçan avtomobili gələn il Yaponiyanın Osaka şəhərində keçiriləcək Expo 2025 sərgisində təqdim etməyi planlaşdırır.

Skydrive SD-05 salonunda üç oturacaq var, qurğu 12 elektrik mühərriki ilə təchiz olunub və şaquli qalxma və enmə qabiliyyətinə malikdir. Maksimal sürət 100 km/saat, uçuş məsafəsi isə 15 km-dir. 2029-cu ilə qədər uçuş məsafəsinin 30 km-ə çatdırılması, 2031-ci ilə qədər isə avtomobilin avtonom pilot sistemi ilə təchiz edilməsi planlaşdırılır. Avtomobil hazırda Yaponiya Mülki Aviasiya Bürosundan (JCAB) sertifikat alma mərhələsindədir.

Digər ölkələrin istehsalçıları da uçan avtomobillərin hazırlanmasında fəal iştirak edirlər. Belə ki, ötən ilin avqustunda Çinin Çanşa şəhərində çəkisi 680 kq olan XPeng X2 uçan avtomobili 1,5 km yolu dörd dəqiqəyə qət edərək ilk uçuşunu həyata keçirib.