Bəybala Mirzəyev: 

Faciəmizi populyarlaşdırmağı bacarmalıyıq...

Biz ildə bir dəfə Xocalı soyqırımını qeyd etməklə və özümüz ağlayıb öz kədərimizə sığınmaqla, “Xocalı soyqırımının dəhşətlərini heç zaman unutmayacağıq” kimi şablonlaşmış ifadələri təkrarlamaqla kifayətlənməməliyik.

Keçən ilin sentyabrında lokal antiterror əməliyyatının nəticəsində Xocalının erməni separatçılarından təmizlənməsindən sonra, indi növbəti mərhələdə görməli olduğumuz əsas iş Xocalı soyqırımının dünya birliyi tərəfindən tanınmasına və Ermənistan dövlətinin Xocalı faciəsinin qurbanlarına kompensasiya ödəməsinə nail olunmasıdır.

Bəli, Almaniya dövləti Holokost qurbanlarına (İkinci Dünya müharibəsi zamanı Hitler faşizmi tərəfindən soyqırımına məruz qalan yəhudilərə) kompensasiya ödədiyi kimi, Ermənistan dövləti də Xocalı soyqırımının qurbanlarına münasibətdə analoji öhdəliyi öz üzərinə götürməlidir.

Əlbəttə, hazırkı xaotik beynəlxalq münasibətlər şəraitində buna nail olmaq elə də asan deyil, lakin prinsipcə mümkündür.

Beləliklə, yeni dövrdə əsas hədəflərimizdən, prioritetlərimizdən biri Xocalı soyqırımının ilkin mərhələdə BMT Təhlükəsizlik Şurasının (TŞ) üzvləri tərəfindən tanınmasına və Ermənistan dövlətinin kompensasiya ödəməyə məcbur edilməsinə nail olmaq olmalıdır. Dünya liderləri hər il aprelin 24-də “erməni soyqırımı”ndan (hərçənd ki, tarixdə belə bir soyqırımı olmayıb) danışıb erməni xalqı ilə mənəvi həmrəylik nümayiş etdirdikləri kimi, eynilə Xocalı soyqırımının da anım günlərində Azərbaycan xalqının kədərinə şərik olduqlarını bəyan etməli və soyqırımı törədənləri lənətləməlidirlər.

Fantastik görünür, eləmi? Lakin ermənilər öz qondarma “soyqırım”larının dünyanın 34 ölkəsi və bir neçə nüfuzlu beynəlxalq təşkilatlar tərəfindən tanınmasına nail ola biliblərsə, deməli, biz də eyni işi bacararıq.

Biz bu gün İtaliyanın Bakıdakı səfirliyinin “X” sosial şəbəkəsindəki hesabında paylaşım edib, “Xocalı faciəsi gələcək nəsillər üçün xəbərdarlıqdır” bəyanatını verməsi ilə və yaxud, Fransanın Azərbaycandakı səfirliyinin “X” sosial şəbəkəsindəki səhifəsində Xocalıda baş verən faciəvi hadisələrin ildönümü ilə əlaqədar Azərbaycan xalqına başsağlığı verib, “Bu gün Xocalı faciəsini yad edən bütün Azərbaycan xalqının kədərinə şərikik” səpkili paylaşım etməsilə əsla qane olmamalıyıq. Biz elə etməliyik ki, bu ölkələrin dövlət və hökumət başçıları da, parlamentləri də kədərimizə şərik olduqlarını təsdiqləyən bəyanatlarla çıxış etsinlər.

Biz hətta Roma Papası Fransiski də məcbur etməliyik ki, xütbələrindən birini ayrıca olaraq məhz Xocalı qurbanlarının xatirəsinə həsr etsin. Çıxışlarından birində saxta “erməni soyqırımı”nı “20-ci əsrin ən ağır faciələrindən biri” kimi təqdim edən Papa Fransisk, indi də zəhmət çəkib elə həmin ermənilərin törətdiyi gerçək soyqırımını – Xocalı faciəsini bütün dünyaya ən yeni tarixin ən amansız soyqırımlarından biri kimi təqdim etməlidir.

Biz buna hökmən nail olmalıyıq. Necə deyərlər, faciəmizi dünya çapında populyarlaşdırmağı bacarmalıyıq. Və bunun üçün biraz da inadkar olmalıyıq. Yeri gələrsə, hətta ermənilər kimi sırtıqlıq etməyi də bacarmalıyıq. Çünki çağdaş dünyamızın murdar reallıqları bu gün bunu tələb edir.