Bəybala Mirzəyev: 

"Ölüm maşını"

İsrailin "ölüm maşını" durmadan işləyir. Budur, Qəzza zolağında ölənlərin (daha doğrusu, öldürülənlərin) sayı artıq 26 mini ötdü.

Belə ki, ötən ilin oktyabrın 7-də HƏMAS-ın israilin dinc sakinlərinə qarşı qəddar hücumundan sonra İsrail Müdafiə Ordusunun raket-bomba zərbələri və quru əməliyyatları nəticəsində Qəzza zolağında qətlə yetirilən fələstinlilərin ümumi sayı 26 083 nəfərə çatıb.

Qətlə yetirilənlərin 8 mindən çoxunun uşaq və yeniyetmə olduğu bildirilir.

Bu barədə məlumat yayan Qəzzadakı səhiyyə qurumu həmçinin

İsrailin hərbi əməliyyatları nəticəsində yaralanan fələstinlilərin sayının 64 487 nəfərə çatdığını bildirib.

Beləliklə, HƏMAS-ın oktyabrın 7-də 1200-dən çox yəhudi sakini qətlə yetirməsinin və 250 nəfəri girov götürməsinin qarşılığı olaraq İsrail ordusu artıq 26 mindən çox fələstinlinin həyatına son qoyub. Bəzi ekspertlər haqlı olaraq bunu İsrailin fələstinliləri "kollektiv cəzalandırması" kimi qiymətləndirir. Bu da o deməkdir ki, İsrailin baş naziri Beniamin Netanyahu kütləvi "ölüm maşını"nı işə salıb.

Ona görə də dünya mediasında B.Netanyahunun İsrailin tarixində gerçəkdən də ən radikal sağçı, qatı millətçi baş nazir olduğu qeyd olunur.

Netanyahu HƏMAS-ın qəddarlığına ikiqat, hətta üçqat artıq qəddarlıqla cavab verir. Beləliklə, yaxın günlərdə və ya həftələrdə Qəzzada öldürülənlərin sayının 30 minə çatdığını eşitsək, təəccüblənməməliyik.

P.S.

Bu arada İsrail prezidenti İshaq Hersoq Davos Forumunda çıxışı zamanı dünya birliyinin mənəvi dəstəyini, həmrəyliyini qazanmaq üçün HƏMAS-ın girovluğunda olan körpə yəhudi uşağının şəklini nümayiş etdirdi. HƏMAS-ın körpə uşağı girov götürməsi heç şübhəsiz ki, insanlığa ziddir. Lakin İsrail hərbçilərinin 8 mindən çox fələstinli uşağı öldürməsi də insanlığa ziddir.

Təəssüf ki, hazırda dünyada yəhudi-ərəb düşmənçiliyini dayandıra biləcək elə bir nüfuzlu lider və ya beynəlxalq qurum yoxdur. "Ölüm maşını" isə öz işindədir...