ELİN TACI

Sən yüksək şəhidlik mərtəbəsində
Dağ tək vüqarlısan, dağ tək ucasan.
Doğmasan bu yurdun hər guşəsində,
Elin Eltacısan, elin tacısan...

        Əhədov Eltac Əjdər oğlu 04 avqust 2004-cü ildə Masallı rayonunun Təzə Alvadı kəndində anadan olub.
Orta təhsilini Çaxırlı kənd tam orta və Təzə Alvadı kənd 2 nömrəli tam orta məktəblərində alıb.
2022-ci il oktyabr ayının 5-də Səfərbərlik və Hərbi Xidmətə Çağırış üzrə Dövlət Xidmətinin Masallı rayon şöbəsi tərəfindən müddətli həqiqi hərbi xidmətə çağırılıb.
Quru Qoşunlarının tərkibində, Laçın rayonundakı “N” saylı hərbi hissədə xidmət  edib.
Azərbaycan Respublikasının Konstitusiya hüququnun, haqqının bərpa edilməsi məqsədilə Silahlı Qüvvələrimiz tərəfindən Qarabağ bölgəsində 19-20 sentyabr tarixində həyata keçirilən qısamüddətli lokal xarakterli antiterror əməliyyatları zamanı Xankəndi istiqamətində döyüşlərdə iştirak edib. 
Atıcı kimi döyüşlərə qatılan Eltac öndə gedən əsgərlərdən olub.   
... Eltac Əhədov 20 sentyabr 2023-cü il tarixdə Vətən torpaqlarının bütövlüyü uğrunda qəhrəmancasına şəhid olub. Təzə Alvadı kəndində torpağa tapşırılıb.
Azərbaycan Respublikasının Prezidenti İlham Əliyevin müvafiq sərəncamlarına əsasən əsgər Əhədov Eltac Əjdər oğlu ölümündən sonra 3-cü dərəcəli “Vətənə xidmətə görə” ordeni, “Vətən uğrunda” medalı ilə təltif edilib.
Ailənin yeganə övladı idi.

Akif AĞAYEV