Şəhriyar Məmmədyarov reytinqdə 2 pillə irəliləyib

Nicat Abbasov isə Top-100-ü tərk edib 

Beynəlxalq Şahmat Federasiyası (FİDE) dünya şahmatçılarınin (kişi və qadınlar) yanvarın 1-ə olan yeni reytinq cədvəlini elan edib. 

Kişilərin reytinq cədvəlində əvvəlki cədvəllə müqayisədə Top-100-də yer alan 4 şahmatçımızdan yalnız üçü ilk yüzlükdə qalıb. Qeyd edək ki, Nicat Abbasovun tərk etdiyi Top-100-də şahmatçılarimiz arasında ən yaxşı göstərici iki pillə yuxarı qalxmaqla 24-cu olan Şəhriyar Məmmədyarova (2726) məxsusdur. Teymur Rəcəbov (2723) Top-100-də 27-ci, Rauf Məmmədov (2651) isə 87-ci pillədə yer alıb.

Kişilərlə müqayisədə qadınların Top100-ündə beş təmsilçimiz yer alıb. Onların arasında isə ən yaxşısı göstərici Günay Məmmədzadəyə (2449) məxsusdur. O, yeni cədvəldə 26-ci yerdədir. Aktivində 2384 xalı olan Ülviyyə Fətəliyeva 64-cü Gövhər Beydullayeva (2374) 77-ci, Gülnar Məmmədova (2351) 97-ci, Xanım Balacayeva isə 2350 xalla 99-cu yerdədir.

Kişilərin reytinq cədvəlində ilk üçlükdə Maqnus Karlsen (Norveç, 2830), Fabiano Karuana (ABŞ, 2804) və Xikaru Nakamura (ABŞ, 2788) cəmləşib.

Qadınların analoji cədvəlində isə çinli Xou İfan (2632), hindistanlı Xampi Koneru (2554) və rusiyali Aleksandra Qoryackina (2553) müvafiq ardıcıllıqla 1-3-cü yerleri tutur.

Aktivində 2646 xalı olan Azərbaycan millisi isə Top5-i tamamlayır.

İNTİQAM Məmmədov