Bəybala Mirzəyev: 

Ekstremist, populist, narkoman namizəd...

Erməniləri şirnikləndirən amerikalı...

Bütün ölkələrin seçki təcrübəsində rast gəlindiyi kimi ABŞ-da da prezidentliyə namizədlər arasında psixi problemi olan şəxslərə, avantüristlərə, seçiciləri boş vədlərlə aldatmağa çalışan böyük yalançılara rast gəlmək mümkündür. Həmin yalançılardan biri də 1963-cü ildə qətlə yetirilmiş ABŞ prezidenti Con Kennedinin qardaşı oğlu Robert Kennedidir.

Hazırkı seçki kampaniyasının “Mister X”-i adlandırılan R.Kennedi prezident seçilmək şansını artırmaq üçün ilk növbədə Amerika ermənilərinin dəstəyini qazanmağa qərar verib. Və bunun üçün də Azərbaycanın əleyhinə danışmağa, ağına-bozuna baxmadan ermənilərə qeyri-real vədlər verməyə başlayıb.

Belə ki, Azərbaycanı ermənilərə qarşı “etnik təmizləmə”də və “Ermənistana təcavüz”də ittiham edən Demokrat Partiyasının üzvü R.Kennedi prezident seçiləcəyi təqdirdə Ermənistana dəstək olacağını və ermənilərin Qarabağa qayıdışını təmin edəcəyini bildirib.

Sitat:

“ABŞ prezidenti kimi mən Ermənistanı yenidən qurmaq üçün diplomatiyadan, mənəvi nüfuzumuzdan, iqtisadi rıçaqlarımızdan və sanksiyalardan istifadə edəcəyəm. Mən Ermənistanın, “Artsax”ın suverenliyinin, onların ərazilərinin bərpasına kömək etmək istəyirəm. Haradasa yeni müharibəyə başlamaq əvəzinə, onlardan birini dayandırmaq istərdim. Dünyanın diqqəti Qəzzaya yönəlib və heç kim Qarabağdan köç barədə danışmır, “qədim erməni ərazilərindən biri”nin bütün əhalisinin “kütləvi surətdə deportasiyası” barədə heç kim heç nə eşitmir. ABŞ ermənilərin “özünümüdafiə, eləcə də öz müqəddəratını təyinetmə hüququ”na regional dəstəyi səfərbər etməlidir. Eyni zamanda, “Artsax” ermənilərinin öz “ata-baba yurdlarına” təhlükəsiz qayıtmasına çalışmalıdır. Amerika hələ də bu regionda təsir rıçaqlarına malikdir və o, bu gücdən “humanitar fəlakət”i aradan qaldırmaq üçün regionun bütün xalqlarını səfərbər etmək üçün istifadə etməlidir. Biz həm də Türkiyə və Azərbaycan tərəfindən Ermənistanın “blokadasını” aradan qaldırmağın yollarını axtarmalıyıq. Ermənistanın dənizə çıxışı yoxdur, onun qonşu ölkələrin limanlarına çıxışı olmalıdır”.

Gördüyümüz kimi R.Kennedinin X sosial şəbəkəsindəki (keçmiş Tvitter) videomüraciəti başdan ayağa böhtanla, təhriflə, əsassız fikirlər və təxribatçı çağırışlarla doludur. “Haradasa yeni müharibəyə başlamaq əvəzinə, onlardan birini dayandırmaq istərdim” deyən Robert Kennedinin sözügedən müraciəti əsl həqiqətdə Ermənistanı revanşizmə, Azərbaycana qarşı yeni müharibəyə təhrik edir.

Kennedinin fikirlərində həm də dünya ağalığı iddiası var. Reallıq hissini itirmiş əksər ABŞ siyasətçiləri kimi nədənsə o da Birləşmiş Ştatları hələ də dünyanın yeganə super gücü, təkbaşına ağası hesab edir. Hal bu ki, ABŞ bu statusunu artıq çoxdan itirib. Və indi dünyada başqa güc mərkəzləri də var.

Görünür Kennediyə və digər amerikalı siyasətçilərə “Paks Amerikana” (Pax Americana) siyasətinin, ABŞ-ın və onun müttəfiqlərinin – kollektiv Qərbin hegemoniyası epoxasının artıq sona çatdığını xatırlatmaq lazımdır. Ermənipərəst siyasətin heç kimə xeyir gətirmədiyi Fransa siyasətçiləri kimi ABŞ siyasətçilərinə də izah edilməlidir.

Ümumiyyətlə, Rusiyanın acı təcrübəsi hər kəsə dərs olmalıdır. Erməniləri uzun illər himayə edən və Azərbaycanın tarixi torpaqlarının hesabına ermənilərə dövlət quran Rusiya sonda ermənilərin xəyanətinə məruz qaldı.

P.S.

Amerikalı siyasətçilərin bir çoxu və ABŞ mediası Robert Kennedini ekstremist və populist adlandırır. Bu adam bir ara həm də narkotiklərə qurşanmışdı. Və o, hətta heroin asılılığından qurtulmaq üçün reabilitasiya kursundan da keçib. Bax belə, ABŞ-dakı erməni lobbisi indi bu keçmiş narkomana ümid bəsləyir.