Bu gün Natiq Qasımovun doğum günüdür 

Bu gün Azərbaycanın Milli Qəhrəmanı Natiq Qasımovun doğum günüdür.

1971-ci ildə Gədəbəy rayonunun Kiçik Qaramurad kəndində anadan olub. 1975-ci ildə ailə Mingəçevirə köçüb, Natiq burada səkkizillik məktəbi bitirib, peşə məktəbində qaynaqçı ixtisası alıb.

Rusiyanın Krasnoyarsk vilayətində Daxili Qoşunlarda xidmət etdikdən sonra 1991-ci ildə Azərbaycana qayıdıb və könüllü olaraq cəbhəyə yollanıb. 

Natiq Qasımov Ağdamda Yaqub Rzayevin başçılığı ilə “Qarabağ şahinləri” dəstəsində ermənilərə qarşı döyüşüb. 1992-ci ilin martında Xocalı rayonunun Xramort (indiki Pirlər) kəndi yaxınlığında 7 Azərbaycan əsgəri, o cümlədən Natiq Qasımov Alban kilsəsinin yerləşdiyi yüksəklik uğrunda döyüşüb. Bu döyüşdə Natiqin 6 yoldaşı şəhid oldu, lakin o, kilsədə strateji mövqe tutaraq təkbaşına döyüşməyə davam etdi.

Tam beş gecə-gündüz Natiq təkbaşına zirvələri tutdu, düşmənləri uzaqlaşdırdı. Amma altıncı gün, 1992-ci il martın 12-də silah-sursatı qurtaranda erməni hərbçiləri tərəfindən əsir götürülür. Əsirliyin şahidi rus jurnalist Konstantin Smirnov və italyan fotoqraf Enriko Sarsini olub.

Natiq Qasımovun tutulması faktı Rusiyanın “Oqonyok” jurnalının 1992-ci il 14-cü və 15-ci nömrələrindəki “Qorxu” məqaləsində təsvir edilmişdir. Natiqin dindirilməsində 1992-ci ildə Əsgəranın işğalına rəhbərlik etmiş bədnam “general” Vitali Balasanyan şəxsən iştirak edib.

2019-cu ildə erməni lobbisinə qarşı informasiya mübarizəsi üçün yaradılmış “ASASmedya” Azərbaycan media resursu Natiq Qasımovun guya sağ olduğu və Ermənistandakı kimya zavodlarından birində işlədiyi barədə məlumat yayıb. Onun haqqında məlumat verənə 1000 dollar, Rusiya, İran, Gürcüstan və ya Türkiyədən qayıdana isə 10 min dollar mükafat təklif edilib. Lakin bu məlumatlar təsdiqlənməyib.

Əsir və itkin düşmüş, girov götürülmüş vətəndaşlarla əlaqədar Dövlət Komissiyası Ermənistan tərəfinə dəfələrlə müraciət etsə də, indiyədək Natiq Qasımovun taleyi naməlum olaraq qalır. Onun adı Ermənistan tərəfindən əsir götürülməsini inkar edən şəxslərin siyahısındadır. Dövlət komissiyasının dəfələrlə müraciət etməsinə baxmayaraq, Ermənistan tərəfi hələ də Natiqlə bağlı məlumatları Azərbaycandan və beynəlxalq təşkilatlardan gizlədir.

Böyük Britaniyanın “Broken Pot Media” şirkəti “Oğul” sənədli filmini hazırlayıb. Filmdə Birinci Qarabağ müharibəsinin iştirakçısı, “general” adlandırılan Vitali Balasanyanın müsahibəsi yer alıb.

Balasanyan Natiq Qasımovu tanımadığını bildirsə də, ehtiyatda olan polkovnik-leytenant Romik Mxitaryan deyib ki, Natiqi dindirən gənc erməni zabit Vitali Balasanyandır. Natiq Qasımovun erməni zabitləri tərəfindən dindirilməsi zamanı orada italyan hərbi fotoqraf Enriko Sarsini də olub. 

Azərbaycan Respublikası Prezidentinin 25 iyun 2024-cü il tarixli sərəncamı ilə Natiq Qasımov ölümündən sonra “Azərbaycanın Milli Qəhrəmanı” adına layiq görülüb və “Qızıl Ulduz” medalı ilə təltif edilib. Həmin il Mingəçevir şəhərindəki 4 nömrəli tam orta məktəbə Azərbaycanın Milli Qəhrəmanı Natiq Qasımovun adı verilmişdir.