“Beynəlxalq Əlillər Cəmiyyəti” İB-dən Prezidentə MÜRACİƏT

Hörmətli Oxucular,
Bildiririk ki, şəxsi əmlakımız olan- Bakı şəhəri, Ş.Mirzəyev-34, mənizl-8 ünvanında "Beynəlxalq Əlillər Cəmiyyəti", “Türk Dünyası Turan Düşüncə Mərkəzi” İB və "Əlillər Dünyası" qəzetinin ofisi 2004-cü ildən rəsmi qeydiyyatdadır və fəaliyyət göstərirdi. Şəhərdə aparılan yenidənqurma işləri ilə bağlı “Vesta Construction” şirkəti tərəfindən həmin mənzilin yerləşdiyi bina sökülüb yerində yeni çoxmərtəbəli bina tikiləcəyinə görə Notariat Kantorunda 2016-cı ilin avqust ayının 18-də rəsmi müqavilə imzalandı. “Vesta Construction” şirkətinin bizimlə bağladığı həmin Müqaviləyə əsasən həm mənzilimiz, həm də hər 3 təşkilatın ofisi 2 il müddətinə bizə tam təmirli şəkildə təhvil verilməli idi. Bina artıq tikilib təhvil verilib, müqavilə üzrə əmlakı olan sakinlərin hamısı öz mənzillərinə köçürülüb. Təəssüf ki, müqavilədə göstərilən, haqqımız olan mənzilimiz, təşkilatların ofisi və 1 avtomaşın üçün dayanacaq yeri  hələ də bizə  təhvil verilmir, 8 ildir ki, əlil və xəstə insanlar kirayələrdə sürünür.  
Əlilliyi olan insanlara, şəhid ailələri üzvlərinə, məcburi köçkünlərə, digər imtiyazlı şəxslərə illərlə təmənnasız, layihədənkənar surətdə etdiyimiz köməkliklər danılmazdır. Gördüyümüz işlər daima KİV-lərdə, sosial şəbəkələrdə işıqlandırılır. Müxtəlif vaxtlarda YAP-ın Nizami Rayon Təşkilatının binasında, AMEA-da, “Xəzər” Universitetində tədbirlər keçirmiş, dövlət təşkilatları  nümayəndələri, geniş ictimayyət qarşısında 2004-cü ildən bu günədək gördüyümüz işlərin hesabatını vermişik. 
“Vesta Construction” şirkətinin yerlə-yeksan etdiyi ofisimizdə o dövrdə dövlətin məsul və vəzifəli şəxsləri, beynəlxalq təşkilatlar və səfirliklərin nümayəndələri olmuşlar. Həmin ofisin qarşısında üzvlərimiz  əlilliyi olan insanlar toplaşaraq ənənəvi olaraq hər il Ulu Öndərimizin anım günü və doğum günlərini qeyd etmiş, məzarını ziyarət etdikdən sonra Ulu Öndərin şərəfinə iməcilik keçirmiş və xatirəsinə ağaclar əkmişdir. Bu tədbirlər AzTV, İTV vasitəsi ilə mütəmadi işıqlandırılıb. Qeyd edək ki, Ekologiya və Təbii Sərvətlər Nazirliyindən aldığımız həmin ağaclar sonradan “Vesta Construction” şirkətinin apardığı tikinti zamanı məhv edildi. 
Bir sözlə, birmənalı şəkildə biz daim Azərbaycan xalqına və dövlətçiliyinə, siyasətinə xidmət edirik. Amma çox təəssüf ki, bu xidmətimizin qarşılığında bizə çox ögey və laqeyd münasibət bəslənilir. 
Səkkiz il öncə həmin bu əmlakımız söküləndə bizə bildirdilər ki, bu, dövlətin və möhtərəm Prezidentimiz İlham Əliyevin pilot layihəsidir, 2 il müddətinə tikilib təhvil veriləcək, ölkə başçısı da binanın açılışına gələcək.  Biz də bu sözlərə inanaraq əmlakımızı tikinti şirkətinə təhvil verərək kirayəyə çıxdıq. Bir daha təəssüflə qeyd edirik ki, 8 il keçsə də köçürülən insanlar onlara verilən mənzillərinə qayıtsa da, Şirkət hələ də müqavilədə göstərilən öhdəçiliyi yerinə yetirmir, bizi heç binaya yaxın da buraxmırlar. 
Biz bu problemlə bağlı aidiyyatı təşkilatlara 3 mindən yuxarı müraciətlər, şikayətlər etmişik. Hətta bu məsələnin həlli üçün dövlət qurumlarında rəsmi şəxslərlə də görüşmüşük. Problemimizin  8 ildir həll olunmaması açıq-aydın göstərir ki, bəzi yüksək vəzifəli məmurlar tutduğu vəzifələrdən sui-istifadə  edərək xüsusi göstərişlə həmin tikinti şirkətinə himayədarlıq edir, onları müdafiə edir, əlilliyi olan insanlarla dövlət arasında süni narazılıq yaradırlar. Bu kim üçün, nə üçün maraqlıdırsa, biz də başa düşmürük. Amma faciəsini yaşayırıq...
Dövlət başçımıza, bütün əlaqədar təşkilatlara müraciət edir,  haqqımızın bərpa olunmasına köməklik göstərməyi xahiş edirik.