12 dekabr -Ümummilli lideri Heydər Əliyevin anım günüdür

Bu gün Azərbaycan xalqının ümummilli lideri Heydər Əliyevin anım günüdür.

Ümummilli liderin parlaq xatirəsi həm Azərbaycanda, həm də onun hüdudlarından kənarda böyük ehtiramla yad edilir.

Heydər Əliyevin səyləri ilə Azərbaycanda vətəndaş müharibəsi təhlükəsi aradan qaldırıldı, sabitlik təmin edildi, iqtisadi tərəqqi dövrü başlandı, Ermənistan-Azərbaycan münaqişəsinin həlli istiqamətində addımlar atıldı.

Heydər Əliyev xalqın yaddaşında özünəməxsus siyasi təfəkkürə və müdrikliyə malik peşəkar və mahir təşkilatçı kimi qalmışdır.

Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə Komitənin sədri vəzifələrində çalışmış, bu müddətdə ona rütbəsi verilmişdir. Leninqradda xüsusi ali təhsil alıb, 1957-ci ildə Azərbaycan Dövlət Universitetinin tarix fakültəsini bitirib. 1969-cu ilin iyulunda Azərbaycan SSR Kommunist Partiyası Mərkəzi Komitəsinin plenumunda Heydər Əliyev onun birinci katibi seçildi. 1982-ci ilin dekabrında Sovet İttifaqı Kommunist Partiyası Mərkəzi Komitəsinin Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini təyin edilmiş, SSRİ-nin rəhbərlərindən biri olmuşdur. 1987-ci ilin oktyabrında Sov.İKP MK Siyasi Bürosunun və baş katib Mixail Qorbaçovun apardığı siyasətə etiraz əlaməti olaraq tutduğu vəzifədən istefa verib.

1990-cı il yanvarın 20-də sovet qoşunlarının Bakıda törətdiyi qanlı faciə ilə əlaqədar ertəsi gün Heydər Əliyev Azərbaycanın Moskvadakı nümayəndəliyində bəyanatla çıxış edərək, Azərbaycan xalqına qarşı törədilmiş cinayətin təşkilatçılarının və icraçılarının cəzalandırılmasını tələb edib. . Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq 1991-ci ilin iyulunda Sovet İttifaqı Kommunist Partiyasının sıralarını tərk edib. 1990-cı ilin iyulunda Azərbaycana qayıdan Heydər Əliyev əvvəlcə Bakıda, sonra isə Naxçıvanda yaşamış və həmin ildə Azərbaycan Ali Sovetinin deputatı seçilmişdir. 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini vəzifələrində çalışıb. 1992-ci ildə Heydər Əliyev YAP-ın Naxçıvanda keçirilən təsis qurultayında partiyanın sədri seçilib.

1993-cü il iyunun 15-də Milli Məclisin iyunun 24-də qəbul edilmiş qərarı ilə Azərbaycan Ali Sovetinin sədri seçilən Heydər Əliyev Azərbaycan Respublikası Prezidentinin səlahiyyətlərini həyata keçirməyə başlayıb. 1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçildi. 1998-ci il oktyabrın 11-də yenidən respublikanın başçısı seçildi. 2003-cü il oktyabrın 15-də keçiriləcək prezident seçkilərində namizədliyini irəli sürməyə razılıq verən Heydər Əliyev sonradan səhhətində yaranan problemə görə iştirakdan imtina edib.

Azərbaycan xalqının ümummilli lideri Heydər Əliyev 2003-cü il dekabrın 12-də ABŞ-ın Klivlend klinikasında vəfat edib.