SU HƏYATDIR! - Ekoloji konfransın təşkili layihəsi davam edir

“Qadın və Gənc Ailələrin Sosial İnkişafı” İctimai Birliyi,  Azərbaycan Gənclər Fondunun maliyyə dəstəyi ilə SU HƏYATDIR! - Ekoloji konfransın təşkili layihəsinə başlamışdır.

Layihənin əsas məqsədi, ətraf mühitin, su ehtiyatlarının qorunması və onlardan səmərəli istifadə edilməsi, müvafiq qlobal ekoloji problemlərin həllinə dəstək vermək üçün gənclərin ekoloji maarifləndirilməsidir. 

Layihə üç ay müddətində Xaçmaz rayonunda həyata keçiriləcəkdir. Ümumilikdə üç seminarı əhatə edəcək layihəyə 120 nəfər gənc cəlb olunacaqdır. 

Azərbaycan Gənclər Fondunun “Yaşıl Dünya Naminə Həmrəylik ili” çərçivəsində elan etdiyi qrant müsabiqəsinin qalibi olan SU HƏYATDIR! - Ekoloji konfransın təşkili layihəsinin ikinci seminarı Xaçmaz rayon C.Cabbarlı adına 6 saylı tam orta məktəbdə keçirildi. Layihədə iştirak edən gənclərə ekoloji maarifləndirici seminar keçirildi. 

Qadın və Gənc Ailələrin Sosial İnkişafı İctimai Birliyinin sədri Tünzalə Cavadova bildirdi ki, layihədə əsas məqsəd hal-hazırda Xaçmaz rayonunun gənclərinin ətraf mühit haqqında biliklərini artırmaq və bununla hal-hazırkı ekoloji durumun və problemin gələcəkdə törədə biləcəyi fəsadları anlatmaqdır.  

Xaçmaz rayon İcra Hakimiyyəti ictimai-siyasi və humanitar məsələlər şöbəsinin baş məsləhətçisi Yaqut Məsimova Xaçmaz rayonunda fəaliyyət göstərən peşə, orta məktəblərin şagirdlərinin ətraf mühit haqqında biliklərini inkişaf etdirmək üçün gəncləri bir araya topladıqları üçün təşkilatın fəaliyyətini yüksək qiymətləndirdi. 

Çıxışçılardan Xaçmaz rayon Ağsaqqallar Şurasının sədri Məhərrəm Abbasov da gənc nəslin su ehtiyatlarından səmərəli istifadə etməli olmalarından və təbiəti çirklənmədən qorumaqla, qarşıda baş verə biləcək müxtəlif təbii fəlakətlərin qarşısını ala biləcəklərindən danışdı. Tədbiri maraqla dinləyən şagirdlər COP29 beynəlxalq tədbiri ərəfəsində belə bir layihənin keçirilməsinin tədqirə layiq olmasından və suyun insan həyatı üçün böyük əhəmiyyətindən danışdılar.

Qeyd edək ki,  layihə Azərbaycan Gənclər Fondu tərəfindən dəstəklənir.