İspaniyada güclü daşqınlar nəticəsində ölənlərin sayı 95-ə çatıb

İspaniyada leysan yağışların səbəb olduğu güclü daşqınlar nəticəsində azı 95 nəfər ölüb.

Bu, 1973-cü ildən bəri ölkədə baş verən ən dəhşətli təbii fəlakətdir.

Ən çox zərər çəkən Valensiya muxtar icması və onun eyniadlı paytaxtıdır - son məlumatlara görə, orada 92 nəfər ölüb.

Ölkə hakimiyyəti üç günlük matəm elan edib, həmçinin zərər çəkmiş ərazilərin sakinlərinə lazımi köməklik göstəriləcəyini vəd edib.

Yağışlar elektrik enerjisinin kəsilməsinə, yolların bağlanmasına, müntəzəm və sürətli qatarların hərəkətinin dayandırılmasına səbəb olub.

İspaniyanın müdafiə naziri Marqarita Robles ölkədə baş verən təbii fəlakəti görünməmiş adlandırıb.

Səlahiyyətlilər ölənlərin sayının arta biləcəyi barədə xəbərdarlıq edib.

İspaniya mətbuatı xəbər verir ki, axtarış-xilasetmə əməliyyatlarına hərbçilər və aviasiya cəlb olunub, ölənlərin cəsədləri, o cümlədən pilotsuz təyyarələrin köməyi ilə axtarışlar aparılır, hərbi psixoloqlar isə zərərçəkənlərlə işləyir.

Avropa Komissiyasının rəhbəri Ursula fon der Leyen bildirib ki, Aİ Kopernik peyk sisteminin köməyi ilə ispan xilasedicilərinin işini əlaqələndirməyə kömək edəcək. Digər Avropa ölkələri də yardım təklif ediblər.

Cümə axşamı İspaniyanın Baş naziri Pedro Sanchez Valensiyaya səfər edəcək və böhran mərkəzinin iclasında iştirak edəcək.

Çərşənbə günü ölkənin şərqində hava şəraiti yaxşılaşmağa başlayıb, lakin meteoroloqlar leysanların şimal-şərqdən Kataloniyaya doğru irəlilədiyi barədə xəbərdarlıq ediblər.

Ölkənin bəzi digər bölgələrində də daşqın xəbərdarlığı edilib.

Daşqınlara bir çox amillər kömək edir, lakin iqlim dəyişikliyinin səbəb olduğu istiləşmə ekstremal hava şəraitini daha da artırır.