Türkiyədə 37 Mossad agenti həbs cəzası alıb

Türkiyədə məhkəmə İsrailin kəşfiyyat agentliyi Mossad-a casusluqda ittiham olunan 37 nəfəri 6 ildən 8 ilə qədər həbs cəzasına məhkum edib. İstanbul Cəza Məhkəməsi müvafiq hökm çıxarıb.

Ümumilikdə bu işdə 60-a yaxın şəxs ittiham olunub. Onlardan 19-u bəraət qazanaraq azadlığa buraxılıb. İki nəfər Ahmet Koray Özquryun və Alperen Erkut 8 il 4 ay həbs cəzası alıb. 35 təqsirləndirilən şəxs 6 il 8 ay müddətinə azadlıqdan məhrum edilib. Onların hamısı “casusluq məqsədilə qadağan olunmuş məlumatları əldə etməkdə” təqsirli bilinib.

İttiham tərəfi əvvəlcə müttəhimlərə “siyasi və ya hərbi casusluq məqsədilə məxfi dövlət məlumatlarını əldə etmək” ittihamı ilə 15 ildən 20 ilə qədər həbs cəzası tələb edib. İstanbul Baş Prokurorluğu iddianamədə qeyd edib ki, İsrail kəşfiyyatı mobil internet proqramlarından istifadə edərək onlayn əməliyyatlar üçün qrup yaradıb. Qrupun Türkiyədəki işə qəbul etdiyi şəxslərə müşahidə tapşırıqlarını yerinə yetirmək və müəyyən şəxslər haqqında məlumat toplamaq üçün pul ödənilib. Müstəntiqlərin qeyd etdiyi kimi, işə qəbul olunanların bəziləri dövlətin təhlükəsizliyinə zərər vuran fəaliyyətlə məşğul olduqlarını başa düşsələr də, dövlət orqanlarından mükafat almaq faktlarını gizlətməyə çalışsalar da, maddi səbəblərə görə əməkdaşlığı davam etdiriblər.

İlin əvvəlində Türkiyə əks-kəşfiyyatının tədbirləri nəticəsində İsrailin Mossad kəşfiyyat xidmətinin Türkiyədə işləməsində şübhəli bilinən 34 nəfər saxlanılıb.