“İRƏLİ” İctimai Birliyinin IX hesabat-seçki konfransı keçirilib

ƏTRAFLI: https://azpresstimes.info/news7534

“İrəli” İctimai Birliyinin IX hesabat-seçki konfransı keçirilib.

Konfransında dövlət qurumlarının, qeyri-hökumət təşkilatlarının nümayəndələri, media mənsubları və 500-ə yaxın gənc iştirak edib. Konfrans Dövlət Himninin səsləndirilməsi, Ümummilli lider Heydər Əliyevin, habelə Azərbaycanın müstəqilliyi və suverenliyi uğrunda canlarından keçmiş Vətən övladlarının əziz xatirəsinin bir dəqiqəlik sükutla yad edilməsi ilə öz işinə başlayıb. Sonra təşkilatın hesabat dövründəki fəaliyyəti haqqında videoçarx təqdim edilib.

Gənclər və İdman Nazirliyinin Gənclərlə iş şöbəsinin müdiri Ramin Cabbarov, VI çağırış millət vəkilləri Əziz Ələkbərli və Musa Qasımlı çıxışlarında təşkilatın son seçki ili ərzindəki fəaliyyətini yüksək qiymətləndiriblər.

Daha sonra İctimai Birliyin İdarə Heyətinin sədri Şahin Rəhmanlı hesabat məruzəsi ilə çıxış edərək, gənclərə göstərilən diqqət və qayğıya görə Azərbaycan Respublikasının Prezidenti İlham Əliyev cənablarına təşkilatın üzvləri adından öz dərin minnətdarlığını bildirib.

"İrəli"nin IX hesabat-seçki konfransında Şahin Rəhmanlı yenidən iki il müddətinə təşkilatın İdarə Heyətinin rəhbəri seçilib. O, Birlik üzvlərinə təşəkkürünü bildirməklə yanaşı, bundan sonra gənclərin hərtərəfli inkişafı istiqamətində öz səylərini əsirgəməyəcəyini bir daha qeyd edib.

"İrəli" İctimai Birliyinin əsas məqsədi milli-mədəni dəyərlərin qorunmasını təmin etmək, gənclərə vətənpərvərlik hislərinin aşılanmasına şərait yaratmaq, gənclərin fərdi inkişafında yardımçı olmaqdan ibarətdir. Təxminən  5000 nəfərdən çox gənc "İrəli" İB-nin üzvüdür.