Bəs Ermənistan Qərblə müttəfiqliyə girsə? Ekspertlər cavab verir

Ermənistan Rusiyadan uzaqlaşaraq ABŞ və Aİ ilə yaxınlaşmaq qərarına gəlib.

Bununla belə, İrəvan bunun nə demək olduğunu anlamır. Ekspertlərin fikrincə, o, Qərbdə əbəs yerə himayədarlar axtarır. Moskva ilə tərəfdaşlığın verdiyini ona verməyəcəklər. 

Ermənistan MDB Xarici İşlər Nazirləri Şurasının aprelin 12-də Minskdə keçiriləcək iclasında iştirak etməyəcəyini bəyan edərək müəyyən mənada Rusiyadan uzaqlaşaraq Qərbə yaxınlaşmaq qərarına gəlib.

İrəvan qərarını Ermənistan-ABŞ-Aİ üçtərəfli formatında keçirilən görüşdən bir neçə gün sonra açıqlayıb və Rusiya Xarici İşlər Nazirliyinin sözçüsü Mariya Zaxarova bunu “Qərbin Cənubi Qafqazı geosiyasi qarşıdurmaya daha bir daha cəlb etmək cəhdi” kimi qiymətləndirib. Moskva Ermənistanın “qeyri-dost hərəkətlərindən” narazılığını gizlətmir və hesab edir ki, bu, Rusiyanı Cənubi Qafqazdan sıxışdırıb çıxarmaq cəhdidir. Moskva ilə İrəvan arasında münasibətlər 2023-cü ilin sentyabrında başlayan ildırımlı hərbi əməliyyatda Azərbaycanın Dağlıq Qarabağı geri qaytarmasından sonra kəskin və sürətlə pisləşməyə başlayıb. Sonra Ermənistan Rusiyanı ittiham etdi ki, onun sülhməramlı qüvvələri bunun qarşısını almaq üçün heç bir iş görməyib.

Üstəlik, Ermənistan ölkənin KTMT-dəki daimi nümayəndəsini geri çağırıb, Ukraynaya humanitar yardım göndərib və daha əvvəl Rusiya prezidenti Vladimir Putinin həbsinə order vermiş Beynəlxalq Cinayət Məhkəməsinə (BCM) qoşulmaq üzrə idi.

Ermənistan Rusiya sərhədçilərinin Zvartnots beynəlxalq hava limanında (Yerevan) işini dayandırmaq üçün Rusiyaya rəsmi niyyət məktubu göndərib. Ermənistan parlamentinin spikeri Alen Simonyan vurğulayıb ki, “Rusiya sərhədçiləri hava limanını tərk etsəydilər, düzgün olardı”. 

"Dəfələrlə təsdiqlənib ki, onlar qorumayıb, əksinə, sərhədləri daha da həssas etmək üçün hər şeyi ediblər. Onlar Qarabağa gəliblər, nə ediblər? Erməni xalqını qovublar".

Lakin 1992-ci il sentyabrın 30-da Ermənistan ərazisində yerləşən Rusiya sərhəd qoşunlarının statusu haqqında Moskva ilə İrəvan arasında imzalanmış sazişə əsasən, Rusiya sərhədçiləri Ermənistanın Türkiyə ilə sərhədlərinin təhlükəsizliyini və mühafizəsini təmin etmək məsuliyyətini öz üzərinə götürdülər. 

Rusiyalı analitiklər Ermənistanın bu addımlarını Moskvanın qeyri-dost hesab etdiyi ölkələr arasında “nüfuzlu dostlar” tapmaq və Rusiya ilə Qərb arasında yaranmış gərginlikdən istifadə etmək cəhdi kimi qiymətləndirirlər.

Ekspertlər demək olar ki, yekdil fikirdədirlər ki, Ermənistanın KTMT-də iştirakını dayandırması postsovet dövründə hərbi təhlükəsizlik sahəsində ən mühüm struktur hesab edilən bu təşkilatdan tam çıxması üçün müqəddimədən başqa bir şey deyil.