“Krokus”da terror aktı törədənlərin telefonlarından məlumatlar əldə edilib

İstintaq Komitəsi Krokusda terror aktı törətməkdə təqsirləndirilən şəxslərin telefonlarından əhəmiyyətli məlumatlar əldə edib.

İstintaq Komitəsinə "Crocus City Hall" konsert zalında terror aktı törətməkdə təqsirləndirilən şəxslərin telefonlarından məlumatlar daxil olub. Bu barədə İstintaq Komitəsinin mətbuat xidməti məlumat yayıb.

“Terrorçuların məhv etməyə çalışdıqları mobil telefonların ekspertizasının nəticələri cinayətə hazırlıq halları ilə bağlı istintaq üçün əhəmiyyətli olan məlumat əldə etməyə imkan verib”, - deyə məlumatda bildirilir.

Martın 22-də axşam saatlarında Crocus City Hall-da terror aktı baş verib. Müstəntiqlərin sözlərinə görə, “Piknik” qrupunun çıxışından əvvəl Dalerjon Mirzoev, Saidakrami Rachabalizoda, Muhammadsobir Fayzov və Şəmsidin Fəriduni avtomatlarla silahlanaraq girişdə ziyarətçilərə atəş açıb, daha sonra isə hücumu konsert məkanının daxilində davam etdiriblər.

Terror aktı zamanı cinayətkarlar binanı benzinlə yandırıblar, nəticədə konsert zalı tamamilə yanıb.

Martın 23-də səhər saatlarında terror aktında şübhəli bilinən dörd nəfər Bryansk vilayətində saxlanılıb, ertəsi gün onlar tutularaq mayın 22-dək istintaq təcridxanasına göndərilib.

Qeyd olunub ki, aprelin 15-də Moskva Şəhər Məhkəməsi “Crocus City Hall”da terror aktı ilə bağlı iş üzrə Əlişir Kasımovun həbsindən verilən şikayətə baxacaq.

Bundan əvvəl “Crocus City Hall”da yanğınla bağlı son yoxlamaların görüntüləri dərc olunmuşdu.