Fransa Rusiyanın “Putin seçkilərini” tanımadı

Fransa dünən başa çatan qondarma Rusiya prezident seçkilərini tanımır və beynəlxalq hüququn və ədalətli seçki prosesi prinsiplərinin çoxsaylı pozuntularını pisləyir. 

Rusiyada seçki prosesi vətəndaş cəmiyyətinə və rejimə qarşı istənilən formada təzyiqlərin artması, söz azadlığına məhdudiyyətlərin artması və müstəqil medianın fəaliyyətinə qadağa qoyulması fonunda baş verib. Fransa Xarici İşlər Nazirliyi müxalifət lideri Aleksey Navalnının “Rusiya hakimiyyəti tərəfindən saxlanma şəraitinin sərtləşdirilməsi səbəbindən” bu seçkilərdən bir müddət əvvəl vəfat etdiyini və Ukraynadakı müharibəyə qarşı çıxan namizədlərin seçkilərdə iştirakına icazə verilmədiyini vurğulayıb. "Təşviqat kampaniyası zamanı namizədlərin KİV-ə bərabər çıxışı ilə bağlı beynəlxalq standartlara əməl olunmayıb. Yenə də azad, plüralist və demokratik seçkilərin keçirilməsi şərtlərinə əməl olunmayıb", - XİN-dən bildiriblər.

Qeyd olunur ki, Rusiya ATƏT-dən olan müstəqil müşahidəçilərin seçkilərdə iştirakına icazə verməyib. Ukrayna, Gürcüstan və Moldovanın işğal olunmuş ərazilərində Rusiya seçkilərinin keçirilməsi də beynəlxalq hüququn kobud şəkildə pozulması idi. “Fransa bu qondarma “seçkiləri” və onların nəticələrini tanımır və heç vaxt tanımayacaq”, - bəyanatda deyilir.