Hikmət Hacıyev: Azərbaycan və Ermənistan artıq real dünyada yaşayırlar

Azərbaycan və Ermənistan artıq əsl sülh şəraitində yaşayırlar, lakin yekun sülh sazişi imzalanmazdan əvvəl qalan hüquqi maneələr aradan qaldırılmalıdır.

Bu barədə Azərbaycan Prezidentinin köməkçisi Hikmət Hacıyev 4-cü Şuşa Qlobal Media Forumununda Reuters agentliyinə verdiyi müsahibədə bildirib.

"Biz əsl sülh şəraitində yaşayırıq. Azərbaycan və Ermənistan üçün sülh sadəcə kağız üzərində yazılmış və ya bəyannamədə olan bir şey deyil; bu, reallıqdır", - deyə Hacıyev bildirib və iki ölkə arasında birbaşa əlaqələrin genişlənməsini və Ermənistana Azərbaycan neft məhsullarının tədarükünün artmasını qeyd edib.

Eyni zamanda, o, Ermənistan Konstitusiyası ilə bağlı Bakının mövqeyinin dəyişməz qaldığını vurğulayıb.

"Konstitusiya dəyişikliklərinin forması Ermənistanın daxili məsələsidir. Azərbaycan üçün ölkəmizə qarşı ərazi iddiaları kimi baxdığımız müddəaların rəsmi olaraq ləğv edilməsi vacibdir - istər yeni konstitusiyanın qəbul edilməsi yolu ilə, istərsə də başqa hüquqi mexanizm vasitəsilə", - deyə köməkçi qeyd edib.

Onun sözlərinə görə, bu məsələ həll edildikdən sonra yekun sülh sazişinin imzalanması üçün heç bir maneə qalmayacaq. Hacıyev vurğuladı ki, sadəcə düzəliş layihəsinin dərc edilməsi kifayət deyil; onlar rəsmi şəkildə təsdiqlənməlidir.

Bundan əlavə, prezidentin köməkçisi bildirib ki, Azərbaycan ABŞ-dan TRIPP nəqliyyat dəhlizi layihəsinin həyata keçirilməsi ilə bağlı "ciddi və müsbət siqnallar" alıb.

"Bizim mövqeyimiz budur ki, bu layihə mümkün qədər tez həyata keçirilməlidir", - deyə o bildirib.

Hacıyev həmçinin bildirib ki, Zəngilan rayonuna aparan Azərbaycan tərəfində infrastrukturun tikintisi əsasən 2026-cı ilin sonuna qədər başa çatacaq. Bundan sonra o, Ermənistan və Türkiyənin nəqliyyat infrastrukturu ilə əlaqə qura biləcək.