Müdafiə nazirinin vəzifədən alınmasından sonra Kiyevdə etirazlar başlayıb

Ukrayna müdafiə naziri Mixaylo Fedorovun vəzifədən alınması Kiyevdə etirazlara və Ukrayna Silahlı Qüvvələrində ilk istefalara səbəb oldu.

Yüzlərlə insan Prezident Aparatının yanında yerləşən İvan Franko Teatrının qarşısında toplaşaraq Vladimir Zelenskinin müdafiə naziri vəzifəsində qalmasını tələb edib.

Etirazçılar əllərində "Fedorovu geri qaytarın" və "Ya dəyişəcəyik, ya da öləcəyik" şüarları yazılmış plakatlar tutublar.

Ukrayna ordusunda da kadr qərarından narazılıqlar yaranıb. Ukrayna Hərbi Hava Qüvvələri komandanının müavini Pavlo Yelizarov istefa verdiyini açıqlayıb.

"Təəssüf ki, müharibənin beşinci ilində Ukrayna Silahlı Qüvvələrindən istefa ərizəsi təqdim etdim. Mixaylo Fedorovun işdən çıxarılmasını ölkənin müdafiə qabiliyyətinə böyük zərbə hesab edirəm", - Yelizarov sosial mediada yazıb.

O, həmçinin istefa ərizəsinin surətini dərc edərək, qərarının əsas səbəbi kimi Fedorovun işdən çıxarılmasını göstərib.

Ukrayna Prezidenti Volodimir Zelenski hökumətin yenidən qurulması çərçivəsində müdafiə nazirinin istefasını təsdiqləyib. Ukrayna mediasının məlumatına görə, qərara Mixaylo Fedorovla Ukrayna Silahlı Qüvvələrinin baş komandanı Aleksandr Sırski arasında kəskin fikir ayrılıqları səbəb olub.

Ali Radanın yeni müdafiə və xarici işlər nazirləri də daxil olmaqla, yenilənmiş Nazirlər Kabinetini təsdiqləməsi gözlənilir. Medianın məlumatına görə, hazırkı daxili işlər naziri İqor Klimenko müdafiə naziri vəzifəsinə əsas namizəddir.