Bakıda Prezident Tokayevin ekoloji təşəbbüsləri müzakirə olunub +FOTO=2

Azərbaycanın aparıcı ali təhsil müəssisəsi olan ADA Universitetində Xəzər dənizinin dayazlaşması məsələlərinə həsr olunmuş “Xəzər problemi: səbəblər, nəticələr və həllər” mövzusunda dəyirmi masa keçirilib.

AZpressTİMES.info xəbər verir ki, tədbir Qazaxıstanın Bakıdakı Səfirliyinin təşəbbüsü ilə 22–24 aprel 2026-cı il tarixlərində Astanada keçiriləcək Regional Ekoloji Zirvə Görüşü ərəfəsində təşkil olunub. Dəyirmi masa akademik dairələrin, elmi institutların, dövlət orqanlarının, diplomatik missiyaların və beynəlxalq təşkilatların nümayəndələrini bir araya gətirib.

Tədbirdə Qazaxıstan Respublikasının Azərbaycandakı Səfiri Alim Bayel, Milli Məclisin Deputatı, ADA Universitetinin Prorektoru Fariz İsmayılzadə, İqtisadi Əməkdaşlıq Təşkilatının Təmiz Enerji Mərkəzinin İcraçı Direktoru Aysel Yaqubova, Qazaxıstan Respublikasının Xarici İşlər Nazirliyinin Xüsusi Tapşırıqlar üzrə Səfiri Zülfiyə Süleymenova, Azərbaycan Respublikasının Xarici İşlər Nazirliyinin İqlim Diplomatiyası Departamentinin Direktoru Elçin Allahverdiyev, Qazaxıstanın Xəzər Dənizi Elmi-Tədqiqat İnstitutunun Rəhbəri Serik Axmetov, Azərbaycanın Milli Hidrometeorologiya Xidmətinin Rəhbəri Nazim Mahmudov, Azərbaycan Milli Elmlər Akademiyasının nümayəndələri, həmçinin ekologiya, su problemləri və iqlim diplomatiyası sahəsində digər aparıcı ekspertlər çıxış ediblər.

Səfir Alim Bayel öz çıxışında Qazaxıstan Prezidenti Kasım-Jomart Tokayev tərəfindən ekoloji gündəliyə verilən xüsusi əhəmiyyəti qeyd edib. 15 mart tarixində Qazaxıstanda yeni Konstitusiyanın qəbul edilməsi üzrə referendum keçiriləcək və həmin Konstitusiyada ilk dəfə olaraq vətəndaşların təbiətin qorunması və onun sərvətlərinə ehtiyatla yanaşması üzrə vəzifələri təsbit olunub. Dövlət isə öz növbəsində insanın həyat və sağlamlığı üçün əlverişli olan ətraf mühitin qorunmasını məqsəd kimi müəyyən edir.

Səfir həmçinin dəyirmi masa iştirakçılarını apreldə Astanada keçiriləcək Regional Ekoloji Zirvə Görüşü barədə məlumatlandırıb. Diplomat Qazaxıstanın lideri K. Tokayevin Birləşmiş Millətlər Təşkilatı sistemi çərçivəsində tamhüquqlu su təşkilatının yaradılması təşəbbüsü barədə də söz açıb.

Aysel Yaqubova Xəzər dənizinin dayazlaşmasının sahilyanı dövlətlər üçün səbəbləri və nəticələri üzərində dayanıb, həmçinin bu problemə beynəlxalq ictimaiyyətin diqqətinin cəlb edilməsinin zəruriliyini qeyd edib. Zülfiyə Süleymenova Xəzər problemlərinin müzakirəsi təşəbbüsünü yüksək qiymətləndirərək, bu gün onun dayazlaşmasını yalnız dövrlülüklə əlaqələndirmək düzgün olmadığını vurğulayıb. Onun sözlərinə görə, su hövzəsinin vəziyyətinə qlobal istiləşmə böyük mənfi təsir göstərir. Z. Süleymenova həmçinin Qazaxıstanın təbiətin mühafizəsi sahəsində nailiyyətləri barədə məlumat verib.

Elçin Allahverdiyev Xəzəryanı ölkələri Xəzər dənizinin ekoloji problemlərinin həlli üçün səyləri birləşdirməyə çağırıb və ilk dəfə olaraq dayazlaşma təkcə ekoloji deyil, həm də iqtisadi problemlərə səbəb olduğunu qeyd edib. Serik Axmetov iştirakçılara Xəzər dənizinin onilliklər üzrə ekoloji vəziyyəti barədə təqdimat təqdim edib və suya qənaət texnologiyalarının tətbiqi də daxil olmaqla problemin mümkün həll yollarını təklif edib.

Ümumilikdə, dəyirmi masa zamanı regionda ekoloji böhranın səbəbləri müzakirə olunub, mümkün həll yolları üzrə fikir mübadiləsi aparılıb. İştirakçılar ətraf mühit problemlərinin birgə həlli istiqamətində Qazaxıstan və Azərbaycanın səylərini yüksək qiymətləndiriblər.