Qazaxıstanda yeni konstitusiya ilə bağlı referendumun nəticələri bu tarixdə açıqlanacaq

Qazaxıstanın Mərkəzi Referendum Komissiyası 15 mart tarixinə təyin olunmuş yeni konstitusiya layihəsi üzrə ümumxalq referendumunun nəticələrini yeddi gün ərzində - 21 mart tarixinə qədər ümumiləşdirəcək.

Bu barədə Mərkəzi Referendum Komissiyasının sədr müavini Muxtar Yerman məlumat verib.

"Mərkəzi Referendum Komissiyası tərəfindən referendum nəticələrinin rəsmi elanı səsvermə günündən ən geci yeddi gün, yəni 21 mart tarixinə qədər mediada dərc olunmalıdır", - Yerman deyib.

Onun sözlərinə görə, referendum üçün təşviqat referendum təyin edildiyi andan başlayır və səsvermə günündən bir gün əvvəl saat 00:00-da başa çatır. Buna görə də təşviqat 12 fevralda başlayıb və sükut günündə (14 mart) başa çatacaq. 27 fevraldan 4 mart tarixinə qədər məntəqə komissiyaları vətəndaşlara səsvermənin vaxtı və yeri barədə məlumat verməlidirlər. Məntəqə referendum komissiyalarının seçki günü səsverməni yerli vaxtla saat 7:00-dan 20:00-dək keçirməsi planlaşdırılır.

Qazaxıstanın yeni konstitusiya layihəsi ilə bağlı 15 martda keçiriləcək ümumxalq referendumunda bir sual veriləcək: "Layihəsi 12 fevral 2026-cı ildə mediada dərc olunmuş Qazaxıstan Respublikasının yeni konstitusiyasını qəbul edirsinizmi?" Kampaniya müddətində Mərkəzi Referendum Komissiyası kimi fəaliyyət göstərəcək Mərkəzi Seçki Komissiyası referendumun təşkili və keçirilməsindən məsuldur.