“Lələtəpədən Şuşayadək-iki ömrün bir yolu” – Masallıda kitab təqdimatı 

Şəhid qardaşlara ithaf olunan ürək səsi

Masallıda şair Rəna Əlisaqızının “Lələtəpədən Şuşayadək – iki ömrün bir yolu” kitabının təqdimatı olub.
Vətən Müharibəsi Qəhrəmanı İntiqam Əsgərli və Aprel döyüşləri qəhrəmanı Nurlan Əsgərli qardaşlarına həsr olunan kitabın təqdimat mərasimində şəhid ailələri, müharibə iştirakçıları, ağsaqqal və ziyalılar, yaradıcı insanlar və ictimaiyyət nümayəndələri iştirak ediblər.
Gənclər Evində keçirilən tədbir öncəsi Azərbaycanın müstəqilliyi və ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad olunub.
Rəna Əlisaqızının həyat və yaradıcılığı barədə geniş məlumat verən yazıçı-publisist, jurnalist-araşdırmaçı Xodaşirin Cəbiyev bildirib ki, müəllifin yaradıcılığında insan taleləri, vətənpərvərlik, analıq duyğuları və milli-mənəvi dəyərlərə sədaqət əsas xətt kimi keçir: “Müəllifin növbəti kitabında da yer alan əsərlər təkcə poetik duyğuların ifadəsi deyil, həm də cəmiyyətə mənəvi mesajlar, vətən sevgisi və qəhrəmanlıq ruhu aşılayan nümunələrdir...”
Qeyd olunub ki, Rzayeva Rəna Əlisa qızı (Rəna Əlisaqızı) 1956-cı il oktyabrın 29-da Masallı rayonunun Viləş (keçmiş Kalinovka) kəndində ziyalı ailəsində dünyaya gəlib. 1976-cı ildə Lənkəran Tibb Texnikumunun “Müalicə feldşer” fakültəsini fərqlənmə diplomu ilə bitirərək həmin ildən kənd xəstəxanasında tibb bacısı kimi əmək fəaliyyətinə başlayıb. Hazırda cərrahiyyə şöbəsində baş əməliyyat tibb bacısı kimi çalışır.
Orta məktəb illərindən ədəbiyyata maraq göstərən Rəna Əlisaqızının şeir, qəzəl, mənsur və satirik şeirləri, bayatı, hekayə və poemaları dövri mətbuatda mütəmadi çap olunub. “Ata ocağı”, “Oxu ürəyimi sən vərəq-vərəq”, “Doğma yurdum Kalinovka”, “Bir xatunun sorağında”, “Qatardan tapılan qız”, “Dedin, mənə şeir yaz” və “Lələtəpədən Şuşayadək” adlı kitablarının müəllifidir. Bir sıra şeirlərinə mahnılar bəstələnib.
Rəna Əlisaqızı “Qızıl qələm”, “Xan qızı Natəvan”, “Şəfalı əllər” media mükafatlarına, “Qafqaz-Media” İctimai Birliyi tərəfindən təqdim olunan “Heydər Zirvəsi” diplomuna layiq görülüb. Gənclərin vətənpərvərlik ruhunda tərbiyəsi, milli və mənəvi dəyərlərin, həmçinin multikultural ənənələrin təbliği istiqamətindəki xidmətlərinə görə müxtəlif fəxri fərmanlarla da təltif olunub.
Tədbirdə yazıçı-publisist, rayon Ağsaqqallar Şurasının sədri Ələşrəf Niftiyev, “Masallı Ziyalıları” İctimai Birliyinin sədri Qardaş Fətullayev, “Tərəqqi” medallı Əməkdar müəllim Mirqabil Hüseynov, Müharibə, Əmək və Silahlı Qüvvələr Veteranları Təşkilatının rayon şöbəsinin sədri Ramiz Tağıyev, müavini Ədalət Hüseynov, müəllifin oğlu – şərqşünas alim, yazıçı Əli Rzazadə, həmçinin yazıçı-şairlər Xanəli Tolış, Dişad Nüsrətqızı, Sülhiyyə Tağızadə, Akif Ağayev və başqalarının çıxışlarında beş fəsildən ibarət kitabın bədii məziyyətlərindən, vətənpərvərlik ruhunun, şəhidlik zirvəsinə ucalan qəhrəman oğullarımızın ömür yolunun, həmçinin Azərbaycan əsgərinin yenilməzliyinin və xalqın birliyinin poetik dillə tərənnüm olunduğu vurğulanıb. Şairənin sözün gücünə, ədəbiyyatın tərbiyəvi təsirinə inandığını və bu inamın onun bütün yaradıcılığı boyunca hiss olunduğunu diqqətə çatdıran natiqlər qeyd ediblər ki, “Lələtəpədən Şuşayadək” təkcə iki qəhrəman qardaşın deyil, bütövlükdə xalqın keçdiyi şərəfli mübarizə yolunun ədəbi salnaməsidir. 
İki şəhid anası Ziba xanım Əsgərova deyib ki, oğullarının həyat yolunun bu cür dəyərləndirilməsi onun üçün həm qürur, həm də təsəlli mənbəyidir: “Rəna xanımın qələmindən çıxan hər bir sətirdə anaların göz yaşı, şəhidlərin ruhu, Vətən sevgisi var. Bu kitab gələcək nəsillərə örnək olacaq.”
Tədbirdə məktəblilər kitabda yer alan şeirlərdən parçalar səsləndiriblər.
Sonda Rəna Əlisaqızı tədbirin təşkilinə görə aidiyyatı təşkilatlara, həmçinin bu işdə zəhməti olan hər kəsə dərin minnətdarlığını bildirib. Müəllif əlavə edib ki, kitabda əks olunan duyğular onun şəhidlərə olan hörmət və sevgi borcunun ifadəsidir və bu kimi əsərlər Vətən yolunda canından keçən igidlərin adını xalqın yaddaşında əbədi yaşadacaq.

Akif VAQİFOĞLU