Tramp "Nil" ordenini alacaq

Misir prezidenti Əbdülfəttah əs-Sisi amerikalı həmkarı Donald Trampı Ərəb Respublikasının ən yüksək dövlət mükafatı olan "Nil" ordeni ilə təltif etmək qərarına gəlib.

Bu barədə Misir liderinin dəftərxanası bildirib.

“Prezident Əbdülfəttah əs-Sisi ABŞ prezidentini sülh səylərinə və münaqişələrin həllinə verdiyi görkəmli töhfələrə görə, ən son Qəzzada müharibənin dayandırılmasındakı əsas roluna görə "Nil" ordeni ilə təltif etmək qərarına gəlib”, - ofisin bəyanatında deyilir.

Bu arada, İsrail prezidenti İsaak Hersoqun ofisi Donald Trampı "girovları evlərinə qaytarmaq üçün göstərdiyi səylərə görə" Prezident Şərəf medalı ilə təltif etmək qərarını açıqlayıb.

Mükafat “Prezident Trampın İsrail Dövlətinə güclü və sarsılmaz dəstəyini, onun İsrailin təhlükəsizliyinə və vətəndaşlarının rifahına misilsiz töhfəsini və bütün regionu sülh və əməkdaşlıq dövrünə aparmağa sadiqliyini” əks etdirir.

Medalı yaxın aylarda İsrail prezidenti təqdim edəcək. Mərasimin vaxtı və yeri daha sonra müəyyən olunacaq.

Bundan əvvəl Tramp İsrail və Fələstinin HƏMAS hərəkatının Qəzza zolağında münaqişənin həlli üçün sülh planının birinci mərhələsinin həyata keçirilməsinə dair razılığa gəldiyini açıqlamışdı. Birinci mərhələdə Həmas israilli girovları azad edəcək, İsrail isə öz qüvvələrini Zolaq daxilində razılaşdırılmış xəttə çəkəcək və yüzlərlə fələstinlini, o cümlədən terrorizmə görə ömürlük həbs cəzası çəkən bir çoxunu İsrail həbsxanalarından azad edəcək.