Tramp və Putinin görüşündən əvvəl Ukraynanın beş tələbi

ABŞ və Rusiya prezidentləri Donald Tramp və Vladimir Putin arasında Alyaskada keçiriləcək görüş ərəfəsində Ukrayna və onun avropalı müttəfiqləri Vaşinqtonun imic formalaşdıran “sülh” sazişi və Tramp üçün Nobel mükafatı naminə Kiyevin maraqlarını qurban verə biləcəyindən ehtiyat edərək, qırmızı xətlər çəkməyə çalışırlar.

Bu barədə “Politico” yazır.

Ukraynanın Rusiya ilə müharibənin nizamlanması çərçivəsində beş əsas tələbi var.

Ukrayna ilkin ərazi güzəştləri olmadan davamlı atəşkəsi təmin edəcək razılaşma əldə etmək niyyətindədir. Kiyev mürəkkəb sərhəd məsələlərini yalnız atəşkəsdən sonra müzakirə etməyə hazırdır, Moskva isə atəşkəs elan olunana qədər qoşunların çıxarılmasında israrlıdır.

Ukrayna tərəfi ayrıca təzminat məsələsini qaldırır. Kiyev Moskvanın dəymiş ziyanı kompensasiya etməsini istəyir.

Dəyəri 500-1 trilyon dollar arasında qiymətləndirilir, Avropanın əlində dondurulmuş Rusiya aktivlərində ən azı 200 milyard dollar var.

Təhlükəsizlik təminatı Kiyev üçün vacib şərt olaraq qalır. Əgər əvvəllər Ukrayna NATO-ya üzvlükdə israr edirdisə, indi Tramp belə bir ssenarini istisna etdiyi üçün Kiyev bunun müqabilində nəsə almaq istəyir. Zelenski qeyd edib ki, ölkəsi bu cür zəmanətlər alana qədər Rusiyaya qarşı sanksiyalar qalmalıdır.

Digər tələb sanksiyaların saxlanması ilə bağlıdır. Trampın onları qaldıra biləcəyi ilə bağlı narahatlıqlar var. Rusiya qanunsuz hesab etdiyi məhdudiyyətlərin ləğvini tələb edir.

Müharibə əsirlərinin və uşaqların geri qaytarılması. Əsirlərin mübadiləsi əslində yeganə məsələdir ki, Moskva və Kiyev İstanbulda son birbaşa danışıqlarda nəticə əldə edə bildilər. Bu yay həm əsirlərin, həm də həlak olan əsgərlərin cəsədlərinin mübadiləsi intensivləşib.