Strateji Tərəfdaşlıq Xartiyası – əməkdaşlığın yeni mərhələsi

"Azərbaycan daha güclü mövqelərə malik tranzit ölkəyə çevrilməyə çalışır."
                                                                        Prezident İlham Əliyev

Azərbaycan Respublikasının Prezidenti İlham Əliyev ilə ABŞ Prezidenti Donald Tramp arasında baş tutmuş görüş, iki ölkə arasında strateji əməkdaşlıq münasibətlərinin dərinləşməsi baxımından xüsusi əhəmiyyət kəsb edir. 
Avqustun 8-də, Vaşinqtonda iki dövlət arasında Azərbaycan Respublikası və Amerika Birləşmiş Ştatları arasında Strateji Tərəfdaşlıq Xartiyasının hazırlanması məqsədilə İşçi Qrupunun yaradılması barədə Anlaşma Memorandumu imzalandı. Bu sənəd, Hökumətlər arasında qarşılıqlı əməkdaşlığın yeni mərhələyə keçidini nəzərdə tutur.
İnanırıq ki, iki dövlət arasında Strateji Tərəfdaşlıq Xartiyasının hazırlanması hər iki ölkənin qarşılıqlı maraqlarını və prioritetlərini nəzərə alaraq əksər sahələrdə əməkdaşlığın dərinləşdirilməsini təmin edəcək.
Bütün dünyaya bəllidir ki, Azərbaycan Xəzər regionunun ən böyük enerji istehsalçılarından biri olmaqla, enerji sahəsində böyük potensiala malikdir. Yəni, adı çəkilən sahə üzrə əməkdaşlığın regionda enerji təhlükəsizliyinin təminatına, enerji nəqliyyat şəbəkəsinin genişlənməsinə töhfə verəcəyi şübhəsizdir. 
O cümlədən, təhlükəsizlik və müdafiə sahəsində əməkdaşlıq regionda sabitliyin qorunmasına və həmçinin qlobal terrorizm və radikalizmə qarşı mübarizəyə yönəlik birgə səyləri gücləndirə bilər.
Azərbaycanın iqtisadi inkişafı və ABŞ-la ticarət əlaqələrinin genişləndirilməsi müxtəlif sahələrdə, xüsusilə texnologiya, infrastruktur və sənaye sahələrində birgə layihələrin həyata keçirilməsi üçün zəmin yaradacaq. ABŞ investorlarının Azərbaycan bazarına giriş imkanı, eləcə də Azərbaycanın ABŞ-a ixracatı artırılacaq.
Xartiya hazırlanarkən iki ölkə arasında demokratik dəyərlər və insan haqları sahəsində əməkdaşlığa da xüsusi diqqət ayrılacaq. 
Azərbaycanın regional rolu, əsasən də Avropa və Asiya arası körpü mövqeyi ABŞ və digər beynəlxalq tərəfdaşlar üçün çox önəmlidir. Odur ki, Strateji Tərəfdaşlıq Xartiyası regional münaqişələrin həlli, iqtisadi inkişaf və ticarət şəbəkələrinin gücləndirilməsi sahələrində əməkdaşlığa da geniş imkan yaradacaq.
Ümumiyyətlə, Strateji Tərəfdaşlıq Xartiyasının hazırlanması, hər iki ölkə üçün müsbət nəticələr vəd edir. 
Əminik ki, bu sənədin hazırlanması, respublikamızın müstəqilliyini və suverenliyini möhkəmləndirərək, ölkəmizin gələcəkdəki inkişaf perspektivlərini daha da parlaq edəcək. Həmçinin bu, Azərbaycanın beynəlxalq diplomatiyada daha güclü və fəal rol almasına səbəb olacaq.

Ceyhun BƏŞİROV,
Lənkəran-Astara Regional Mədəniyyət İdarəsi Masallı nümayəndəliyi ərazi partiya təşkilatının sədri.