Tahir Süleymanov: 

Qalib xalqın qalib futbolu olmalıdır!

Yaxın bir-iki həftədə AFFA növbəti Hesabat-seçki Konfransının keçiriləcəyi yeri, tarixi elan edəcək. Nizamnaməyə uyğun, ən geci mart ayına təsadüf edəcək tədbir, Azərbaycan futbolunun sabahını, strateji olaraq minimum 4-5 illik fəaliyyətini, hansı istiqamətdə addımların atılacağını müəyyən edəcək.

Futbol ictimaiyyəti, mütləq əksəriyyət, geniş azarkeş kütləsi, bu sahədə baş verən proseslərdən, yaradılan şəraitə, dövlət qayğısına baxmayaraq, futbolun tənəzzülə uğramasından məmnun deyil. Qalib xalqın - qələbələri sıralayan - qalib futbolu olmalıdır!

Yeni ilin ilk iki ayı Azərbaycan futbolu üçün böyük əhəmiyyət kəsb edir. Susqunluq, futbol problemlərinin ictimaiyyət arasında geniş müzakirələrə yol açmaması, futbolda dağıdıcı qüvvə rolunu oynayan, şəxsi məqsədlərini güdən hazırkı federasiya rəhbərliyinə sərfəlidir.

Problemlərin qabardılması, geniş təhlillər qanunlara söykənməlidir. İndiki vəziyyətdə emosiyalar, narazılıqlar ancaq prosesin ziyanına işləyər. AFFA Nizamnaməsinə söykənərək ictimaiyyətə geniş məlumatlar verilməli, seçkilərdə səsvermə hüququna malik olan qurumların kimliyi futbol camiyəsinə çatdırılmalı, gedişat kabinetlərdən çıxarılaraq ictimailəşdirilməlidir. Hər bir səsvermə hüququna malik şəxs(lər), ölkə futbolunun gələcəyi naminə məsuliyyət daşıyır!

Futbol qanunlarını mükəmməl bilən mütəxəssislərin sayı çox olmasa da, bu missiyanı öz üzərinə ilk növbədə futbol adamları götürməlidir. Futbol təsərrüfatında birliyin yaradılması şərtdir! İstiqamət düzgün götürülməli, məsələlərə qlobal, strateji ardıcıllıqla yanaşılmalı, AFFA-nın birbaşa və dolayı üzvləri, nümayəndələri aktivləşməli, konfransa hazırlıq mərhələsi olaraq sorğu-suala çəkilməlidir. Federasiya rəhbərliyi təmsilçilərinin kimliyinin müəyyənləşməsi - onların hər birinin bir səsindən asılıdır!

Əksəriyyət əmr gözləyir. Əmr verən də futbol ictimaiyyətinin fəallığını... İctimai nəzarət, futbol qaunlarına söykənən aktivlik, o səviyyədə olmalıdır ki, əmr verənlə cəmiyyət/azarkeşlər arasında vahid birlik yaradılsın, fikirlər üst-üstə düşsün. Köhnələrə, indiki AFFA rəhbərliyinə dəstəyin veriləcəyi halda, yenidən tək futbola zərbə vurulmayacaq, əmr verən də ziyan çəkəcək, mənfi ictimai rezonans doğuracaq...

AFFA-da təbii olaraq çatlar əmələ gəlib. Təbiidir, Son 20 ildə olmazın imtiyazlara rəğmən, Azərbaycan futbolu çökdürülüb. Bu illər ərzində seçkiöncəsi ölkə futbolunda ən münbit şərait yaranıb. Əmr vərənlə futbol ictimaiyyəti, azarkeşlər arasında yaradılan Xankəndi futbol tədbirindəki möhtəşəm birlik davam etməli, mart ayında, AFFA seçkilərində Azərbaycan futbolunun dirçəlməsi yolunda son, qanuni nöqtə qoyulmalıdır!