Hərbi cinayətlər törətməkdə təqsirləndirilən erməniəsilli şəxslərin məhkəməsi keçirilib

Mayın 16-da Bakı Hərbi Məhkəməsində sülh və insanlığa qarşı cinayətlər törətməkdə, müharibə və hərbi cinayətlərə, o cümlədən hərbi cinayətlərə hazırlıq, soyqırım, soyqırım törətməkdə təqsirləndirilən Ermənistan vətəndaşları Arayik Arutyunyan, Arkadi Qukasyan, Bako Saakyan, David İşxanyan, Davit Babayan, Lyova Mnatsakanyan və digərlərinin cinayət işlərinə baxılması üzrə növbəti məhkəmə iclası keçirilib.

Hakim Zeynal Ağayevin sədrliyi ilə keçirilən prosesdə hakimlər Camal Ramazanov və Anar Rzayevin (ehtiyat hakim Günel Səmədova) sədrliyi ilə keçirilən prosesdə təqsirləndirilən şəxslərin hər birinə danışdıqları dildə tərcüməçi, habelə müdafiələri üçün vəkillər ayrılıb.

Məhkəmə iclasında təqsirləndirilən şəxslər, onların müdafiəçiləri, zərərçəkmişlərdən bəziləri, onların hüquqi varisləri və nümayəndələri, dövlət ittihamını müdafiə edən prokurorlar iştirak ediblər.

Məhkəmədə baş prokurorun xüsusi işlər üzrə köməkçisi Tuqay Rəhimli Azərbaycanın Ermənistan tərəfindən əvvəllər işğal olunmuş suveren ərazilərində mədəni irsin dağıdılmasını əks etdirən sənədlərə baxmağa başlayıb.

Belə ki, tərcüməçinin köməyi ilə 1993-cü il aprelin 7-də Kəlbəcərin Ermənistan ordusu tərəfindən işğalı ilə bağlı xarici KİV-də dərc olunmuş məqalə araşdırılıb.