Məhkəmədə Kəlbəcərin Ermənistan tərəfindən işğalını əks etdirən videogörüntülər nümayiş olunub

Bakı Hərbi Məhkəməsində davam edən prosesdə Kəlbəcər rayonunun Ermənistan tərəfindən işğalını əks etdirən videogörüntülər təqdim olunub.

Videoçarx Ermənistan silahlı qüvvələrinin mövqelərinin yerləşdirilməsinin müzakirəsi ilə başlayır. Kadrlarda Monte Melkonyanın erməni hərbçilərinə bir neçə dəfə sual verməsi görünür: “Biz bu gün nə etdik?”, “İndi haradayıq?”, “Dünən harada idik və nə etdik?”.

Cavab olaraq əsgər bildirir ki, hazırda Kəlbəcərin 20 kilometrliyindədirlər.

Monte Melkonyan videoda deyir ki, onlar Ağdərənin qərb hissəsindən, Ağdaban istiqamətindən hərəkətə başlayıblar və indi Kəlbəcərə çatıblar. Videoda “Avo” ləqəbi ilə tanınan Melkonyan deyir: “Kəlbəcərin ilhaqı ilə bütün Qarabağ Ermənistana birləşdiriləcək və Ermənistana gedən bir çox yollar açılacaq: “Ümid edirəm ki, azərbaycanlılar hər şeyin bitdiyini anlayıb qəbul edəcəklər”.

Həmçinin kadrlarda azərbaycanlıların ciddi müqavimət göstərib-göstərməməsi ilə bağlı sualı cavablandıran Melkonyan deyir: "Bəli, bu, güclü xətt idi. Biz bura Laçın yolunu bağlamaqla gəldik. Hər bir erməni başa düşməlidir ki, onun bu məsələdə iştirakı son dərəcə vacibdir. Bu ərazilər 1988-ci ildə qərara alındığı kimi, Ermənistana birləşdiriləcək".

Videoda Melkonyan döyüşlərdə 70-ə yaxın azərbaycanlının həlak olduğunu iddia edir. Kadrlarda öldürülən azərbaycanlıların meyitlərinin görüntüləri yer alıb.

Videoda erməni qoşunlarının Kəlbəcər və ətraf kəndlərə yeridilməsinin görüntüləri də əks olunub.

Qeyd edək ki, Ermənistanın hərbi təcavüzü nəticəsində sülhə və bəşəriyyətə qarşı cinayətlər törətməkdə, hərbi cinayətlər, o cümlədən təcavüzkar müharibənin hazırlanması və aparılmasında, soyqırımda, müharibə qanunlarının və adət-ənənələrinin pozulmasında, o cümlədən terrorizmi maliyyələşdirməkdə, terrorizmi maliyyələşdirməkdə, hakimiyyətə sui-qəsd, zorakılıq və digər cinayətlər törətməkdə təqsirləndirilən Ermənistan Respublikası vətəndaşlarının məhkəməsi davam edir.