Erməni hərbçiləri Ermənistan tərəfindən xaricə təlim keçmək üçün göndərilib

Aprelin 4-də Bakı Hərbi Məhkəməsində davam edən məhkəmə prosesində təqsirləndirilən Ermənistan vətəndaşı, bu ölkənin silahlı qüvvələrinin keçmiş hərbi qulluqçusu, general-mayor David Manukyan dövlət ittihamçısının suallarını cavablandırarkən bildirib ki, Azərbaycanın bir vaxtlar işğal olunmuş ərazilərində hərbi xidmətdə olarkən o, Ermənistan Respublikasının Frunze Hərbi Akademiyasında təhsil almağa göndərilib.

O, işğal olunmuş ərazilərdə xidmət edən bir sıra zabitlərin təlim keçmək üçün başqa ölkələrə göndərildiyini də bildirib. "Hərbi heyət Rusiya, ABŞ, Almaniya və Yunanıstana təhsil almağa göndərilib. Bu prosesi Ermənistan Müdafiə Nazirliyi həyata keçirib. Onların xaricdə kurslar keçərkən maaşları da Ermənistan Müdafiə Nazirliyi tərəfindən ödənilib".

Xatırladaq ki, sülh və bəşəriyyət əleyhinə cinayətlər, hərbi cinayətlər, o cümlədən təcavüzkar müharibənin hazırlanması və aparılması, soyqırımı, müharibə qanunlarının və qaydalarının pozulması, habelə terrorizm, terrorizmin maliyyələşdirilməsi, hakimiyyətin zorakılıqla ələ keçirilməsi və saxlanılması və bir çox başqa cinayətlərdə ittiham olunan Ermənistan vətəndaşlarının məhkəməsi davam edir.