Ağadadaş Ağayev ona çıxarılan hökmdən danışıb

Ötən həftə Azərbaycanın xalq artisti Ağadadaş Ağayevin ittiham olunduğu cinayət işi üzrə səs-küylü məhkəmə prosesi başa çatıb. Binəqədi Rayon Məhkəməsində Vüsal Tağıyevin sədrliyi ilə keçirilən prosesdə hökm elan olunub.

Qərara əsasən, A.Ağayev xuliqanlıqda təqsirli bilinərək 2 il müddətinə azadlıqdan məhrum edilib. Lakin Azərbaycan Cinayət Məcəlləsinin şərti cəza təyin etmə ilə bağlı 70-ci maddəsinin tətbiqi ilə təyin olunmuş cəza şərti hesab olunur.

Bu gün A.Ağayev vəkili Asim Abbasovla birgə hökmə münasibət bildirmək və həbsi ilə bağlı yayılan xəbərləri dağıtmaq üçün kamera qarşısına keçib. Xalq artisti bütün xidmətlərinə və mükafatlarına baxmayaraq, “qanun qarşısında boynun tükdən də nazik olduğunu” vurğulayıb. O, Azərbaycan xalqını qarşıdan gələn bayram münasibətilə təbrik edib.

Xalq artistinin vəkili cəzanın şərti hissəsinin mətbuatda kifayət qədər düzgün işıqlandırılmaması ilə izah edib. Faktiki olaraq A.Ağayevə iki il sınaq müddəti olmaqla şərti cəza verilib.

Xatırladaq ki, ötən ilin iyulunda sosial şəbəkələrdə A.Ağayevlə Medera xəstəxanasının mühafizəçisi Nurəddin Cəlilov arasında baş verən davanın videosu yayılmışdı. Sənətçi kişiyə hücum edərək balta atıb və balta tibb müəssisəsində təmizlik edən N.Paşayevanın ayağına dəyib. Nəticədə sonuncu yaralanıb. Bundan sonra klinikanın mühafizəçisi xalq artistini döyüb.