Azərbaycan Uşaqlar, Gənclər və İqlim Fəaliyyəti haqqında Bəyannamə imzalayıb

BMT-nin İqlim Dəyişikliyi üzrə Çərçivə Konvensiyasının (COP29) Tərəflərinin 29-cu Konfransının əvvəlində Azərbaycan Uşaqlar, Gənclər və İqlim Fəaliyyəti haqqında Bəyannaməni imzalayıb və bununla da iqlim siyasətində uşaqları birinci yerə qoymağı öhdəsinə götürüb.

Bəyannamənin imzalanması mərasimində Azərbaycan Respublikasının ekologiya və təbii sərvətlər naziri, COP29-un prezidenti Muxtar Babayev, UNICEF-in icraçı direktoru Ketrin Rassel, COP29 üzrə Azərbaycanda gənclər arasında iqlim çempionu Leyla Həsənova, yüksək vəzifəli dövlət nümayəndələri, eləcə də Azərbaycanın gənc vətəndaşları iştirak edib.

UNICEF bu bəyannamənin imzalanması ilə Azərbaycan hökumətinin üzərinə götürdüyü öhdəlikləri alqışlayır. Buna görə də bu bəyannamə uşaqlar və gəncləri prioritetləşdirən inklüziv iqlim siyasətini və hərəkətlərini sürətləndirmək üçün yerli və qlobal səviyyədə qəbul edilmiş ilk belə çərçivə sənədidir.

İqlim dəyişikliyi uşaqların sağlamlığına, inkişafına, təhlükəsizliyinə və əsas xidmətlərə çıxışına böyük təsir göstərir. Dünya uşaqlarının yarısı olan bir milyarda yaxın uşaq 33 ölkədən birində iqlim dəyişikliyinin və çirklənmənin təsirindən “son dərəcə yüksək risk altında” yaşayır.

COP29-un prezidenti Muxtar Babayev deyib: “Biz hər kəsi iqlimlə bağlı fəaliyyətin uşaqlar və gənclər üçün daha davamlı gələcək yaratmağa necə kömək edə biləcəyi barədə düşünməyə dəvət edirik”.

UNICEF-in İcraçı Direktoru Ketrin Rassel deyib: “Bizim uşaqları iqlim dəyişikliyi siyasətinin mərkəzinə qoymağımız və onları iqlim dəyişikliyinin təsirlərindən qoruyan həll yollarına sərmayə qoymağımız çox vacibdir”. “Azərbaycanın bu bəyannaməni imzalaması uşaqların maraqlarını iqlim gündəminin mərkəzinə qoyacaq daha bir addımdır”, o əlavə edib.