“Statistik məlumatlardan istifadə” – Masallıda seminar-müşavirə

Sentyabrın 12-də Masallı Rayon Statistika İdarəsində “Statistik məlumatlardan istifadə olunması” mövzusunda seminar-müşavirə keçirildi.

Masallı Rayon Statistika İdarəsinin təşkilatçılığı, Masallı Rayon İcra Hakimiyyətinin dəstəyi ilə keçirilən tədbirdə Kütləvi İnformasiya Vasitələrinin nümayəndələri (“Yeni həyat”, “Həqiqətlə üz-üzə” ictimai-siyasi qəzetləri, “Asiya.az”, “Azadmedia.az”, “Azpresstimes.info” saytları, “Masallı Xəbərləri” MİP), idarə, müəssisə və təşkilatların statistik hesabat təqdim edən məsul əməkdaşları iştirak edirdi.

Seminar-müşavirəni giriş sözü ilə açan Masallı Rayon Statistika İdarəsinin rəisi Ramin Bəgəlizadə statistik məlumatların yayılması sahəsində siyasətin səmərəliliyini həm hazırlanan statistik məlumatların vaxtlı-vaxtında olmasını, həm də bu məlumatların nə dərəcədə reallığı əks etdirməsini, onların dəqiqliyini iştirakçıların diqqətinə çatdırdı. İdarə rəhbəri statistika orqanlarına nüfuzun artmasında və ona olan inamın yüksəlməsində Kütləvi İnformasiya Vasitələrinin müstəsna rolundan bəhs etdi.

Masallı Rayon İcra Hakimiyyətinin məsul işçisi Əli Məmmədov rəsmi statistika məlumatlarının dövlət səviyyəsində müvafiq tələbatların ödənilməsi istiqamətində zəruriliyini vurğuladı.

Statistika İdarəsinin məsləhətçisi Elmin Əliyev Dövlətstatkomun rəsmi veb saytında (stat.gov.az) yerləşdirilmiş elektron xidmətlər barədə məlumat verdi, Azərbaycan Statistik İnformasiya Sistemindən (ASİS) məlumatların əldə olunmasını praktiki olaraq izah edərək, tematik xəritələrdən istifadə qaydalarını göstərdi. O, həmçinin statistik məlumatların istifadəçiləri, məlumatların vizulyasiya üsulları, statistik nəşrlərin əldə olunması qaydalarından danışdı.

Diskusiya şəklində davam edən müşavirədə iştirakçıları maraqlandıran suallar cavablandırıldı. 

Akif AĞAYEV