“Azərbaycanda aqrar sahənin inkişafında Ümummilli Lider Heydər Əliyevin rolu" kitabının təqdimatı keçirildi

İyunun 5-də Ağcabədi Rayon İcra Hakimiyyətinin təşkilatçılığı ilə Azərbaycan Respublikası Kənd Təsərrüfatı tabeliyində Aqrar Tədqiqatlar Mərkəzində hazırlanmış “Azərbaycanda aqrar sahənin inkişafında Ümummilli lider Heydər Əliyevin rolu” mövsuzunda çap olunmuş kitabın təqdimatı ilə bağlı tədbir keçirilib. 
"AzPress" İnformasiya Agentliyinin "AZpressTİMES.info" saytının bölgə müxbiri xəbər verir ki,   Ağcabədi rayon rəhbərliyi və tədbirə dəvət olunmuş qonaqlar öncə Ulu öndər Heydər Əliyevin abidəsini ziyarət edərək önünə çiçək dəstələri düzüblər. Bundan sonra tədbirin keçirildiyi Yaqub Məmmədov adına Ağcabədi Mədəniyyət Mərkəzinin foyesində təşkil olunmuş kitab sərgisinə baxış keçirilib. 
Azərbaycan Respublikasının Dövlət Himni səsləndirildikdən sonra Ulu öndər Heydər Əliyevin, eləcə də torpaqlarımızın azadlığı uğrunda canından keçmiş Vətən qəhrəmanlarının xatirəsi bir dəqiqəlik sükutla yad olunub. 
Təqdimat mərasimində “Aran Ağcabədi”  televiziyasının hazırladığı “Heydər Əliyev və Azərbaycanın kənd təsərrüfatı” adlı qısametrajlı film nümayiş olunub.
Tədbirdə “Azərbaycanda aqrar sahənin inkişafında Heydər Əliyevin rolu” mövzusunda məruzə ilə çıxış edən Milli Məclisin deputatı, Aqrar siyasət komitəsinin sədri Tahir Rzayev Ulu öndər Heydər Əliyevin Azərbaycanın bütün sahələrində olduğu kimi təsürrüfat sahəsində də olan müstəsna rolundan, məhz onun rəhbərliyi ilə həyata keçirilən uğurlu iqtisadi inkişaf stategiyasından danışıb. Tahir Rzayev həmçinin qeyd edib ki, işıq üzü görən kitab Heydər Əliyev irsinin öyrənilməsi ilə yanaşı, Azərbaycanın kənd təsərrüfatının müasir tarixi ilə maraqlananlar üçün olduqca faydalı olacaqdır.
Məruzə ərtafında çıxış edənlər – Azərbaycan Respublikası Kənd Təsərrüfatı Nazirliyinin “Bitkiçiliyin monitorinqi və təşkili” şöbəsinin müdiri İmran Cümşüdov, Ağcabədi Suvarma Sistemləri idarəsinin müdiri Azər Bayramov,  pambıqçı-fermer, Salmanbəyli kənd sakini Etiram Həsənov, Ağcabədi Dövlət Aqrar İnkişaf Mərkəzinin direktoru Abbas Süleymanov,  baramaçı-fermer, Sarıcalı kənd sakini İsrəfil Zülfəliyev və Ağcabədi Rayon İcra Hakimiyyətinin başçısı Rafil Hüseynov işıq üzü görən kitabın təsərrüfatçılar, fermerlər üçün yaxşı metodiki vəsait olacağından söz açıblar. O da qeyd olunub ki, Ulu öndər kənd təsərrüfatında islahatların aparılması məsələsinə həmişə xüsusi diqqətlə yanaşmışdır. Heydər Əliyev aqrar sahədə dəyişikliklərin mərkəzi məsələsi olan torpaq islahatının aparılmasının prinsiplərini müəyyən etmişdir. Məhz bu prinsiplər əsasında ədalətlilik və səmərəlilik tələbləri önə çəkilməklə torpaqlar kənddə yaşayanların xüsusi mülkiyyətinə verilmişdir.
Tədbirdə fermerlərə olunan müəyyən güzəştlərlə bağlı ilk növbədə fermerlərin torpaq və gəlir vergisindən azad edilməsinin bu sahədə böyük uğur olması, təsərrüfatçıya verilən yüksək dəyər kimi vurğulanıb. Məhsul istehsalçıları torpaq vergisindən başqa, bütün vergilərdən azaddır və bu yolla qazandıqları gəlirlər hesabına istehsalatı genişləndirmək imkanı əldə edirlər, deyə natiqlər qeyd ediblər. 
Tədbirdə həmçinin Ağcabədi rayonunun təsərrüfatında ötən il və bu il əldə olunmuş uğurlu məhsul göstəricilərindən, eləcə də bundan sonra qarşıda duran vəzifələrdən danışılıb. 

Mais İbrahimov