Bahəddin Həzi:

DTX-nin əməliyyatı Fransa kəşfiyyatının ardıcıl məğlubiyyətini isbatladı

Dostlar, yaxşıya yaxşı demək lazımdır; Azərbaycan Dövlət Təhlükəsizliyi Xidməti çox mühüm bir əməliyyat keçirib. DTX Fransa kəşfiyyatının iki əməkdaşını deşifrə etdi. Bunun nəticəsində Xarici İşlər Nazirliyi Fransaya etiraz notası verdi. Fransanın səfirliyində diplomat "çətir"i altında kəşfiyyatla məşğul olmuş iki nəfər ölkədən qovuldu. Fransa prezidenti ölkəsinin məxfi xidmətlərinin məğlubiyyətini etiraf etməyə məcbur oldu; Emmanuel Makron Fransa Xarici Təhlükəsizlik Baş İdarəsinin rəisi Bernar Emyeni vəzifəsindən azad etmək zorunda qaldı.

Bu, təkcə Cənubi Qafqazda deyil, bütövlükdə dünyanın böyük hissəsində Fransa kəşfiyyatının - dövlətinin ardıcıl məğlubiyyətini isbatladı.

Bilirsiniz ki, Fransa Hindistanla yanaşı Ermənistanı silahlandıraraq Cənubi Qafqazda yeni qarşıdurmaya, erməni revanşizminin xülyalarına hərbi-siyasi sponsorluq edir. Deməli, Fransa kəşfiyyatçıları Azərbaycanda mahiyyətcə həm də Ermənistanın xeyrinə iş aparıblar. DTX-nin bu əməliyyatı Vardanyanın, Arayik Arutyunyanın və o biri separatçı rejim "başçıları"nın həbsi qədər, bəlkə daha böyük hadisədir. Ona görə də bu əməliyyatı və sonrasında atılan addımları təqdir etmək lazımdır.