Ulduz Qasım: Təşəkkür edirəm, canım mənim, gözəl, istedadlı, Günelim! Ancaq, bilirsən, bu tarix mənim dakumentdə olan tariximdi. Əslində 08.08.-də dünyaya göz açmışam. Olsun, sənin nə zaman təbrik yazmağındı önəmli olan.

Günel Mövlud:

"Fədakarlıq" sözü insan olsaydı, yəqin ki, bu qadın olardı..

"Fədakarlıq" sözü insan olsaydı, yəqin ki, bu qadın olardı. Gözəl bibim, babamın fəxri, ailəmizin ümid yeri, mələk qəlbli bibimiz, yazıçı Ulduz Qasım...

Birinci Qarabağ Müharibəsindən sonrakı illər, yəqin ki, hamının yadındadı. Ən sadə ərzaqların, ən sadə ehtiyacların ya heç tapılmadığı, ya da minbir zülümlə tapıldığı illər. Qıtlıq, xaos, total depressiya, qeyri-müəyyənlik. O illərdə hardansa gələn cüzi bir köməyin elə böyük əhəmiyyəti vardı ki, o illərdə insanın hardasa bir ümid yerinin olmasına elə ehtiyacı vardı ki...

Bizim ümid yerimiz o idi. Təkcə ailəmizin deyil, yaxın-uzaq qohumların deyil, ölkənin dörd yanına səpələnmiş kəndlilərimizin, yaxından-uzaqdan ailəmizi tanıyanların, daha kimlərin, daha kimlərin...

Onun Moskvadakı evi ümid yeri idi, o çətin illərdə pənah qapısı idi. Xəstəsi olan, tələbəsi olan, iş axtarmağa gedən...Hamı onun evinə pənah aparırdı. Bircə dəfə də kimisə naümid qaytarmaq, köməyini əsirgəməzdi. Qohumlarını, kəndlilərini günlərlə, həftələrlə (bəzilərini illərlə!) evində saxlayıb, xəstəni həkim yanına aparıb, tələbəni universitetində, yataqxanasında, kirayə qalacağı yerdə yerləşdirib, iş axatarana iş tapıb, kimsəni naümid qaytarmazdı.

Evinin bütün otaqlarında kömək üçün gələn insanları yerləşdirib, yoldaşı, uşaqları ilə mətbəxdə yatdığı az olmayıb. Bəs, bir dəfə olsun, qaşlarını çatıb, üzünü turşudardımı...Yox!

Bəzən yay aylarında bir neçə günlük bizə gəlirdi. Əynindəki paltar, boynundakı şərf, əlindəki çanta, boyun-boğazındakı bəzəklərə elə gözümüz düşürdü ki...Qıtlıq illəri idi, insanların ayda-ildə bir paltar almağa belə imkanı yox idi, o ki qaldı bər-bəzək, kosmetika olsun...Boğazındakı şərfi açırdıq, əlindəki çantanı alırdıq, qulağındakı sırğanı birimizə, tuflilərini birimizə, əynindəki paltarı belə kiməsə bağışlayıb, köhnə xalat, şəpşəpi geyinib, geri gedirdi. Bir dəfə olsun, üzünü turşutduğunu görmədik. Gülümsəyə-gülümsəyə, saçımızı-başımızı sığallaya-sığallaya edirdi bunların hamısını...

Tanrı, təbiət, tale - hər nədirsə, ona həmişə ürəyinin təmizliyinə, gözəlliyinə görə verdi. İmkanı oldu, qohumlarına, sevdiklərinə daha çox xərclədi, maşınlar, mənzillər bağışladı. Onlarla ailə illər uzunu onun əlinə baxdı, hər çətinlikdə ondan umdular, ondan gözlədilər. Bir dəfə də olsun, kimsəyə minnət qoymadı, təkəbbür göstərmədi.

Rayonumuzun birinci qadın jurnalisti idi, yüksək mədəniyyəti, savadı, işi, karyerası, imkanı - heç nə onun sadə, mülayim, ipək xasiyətini dəyişmədi. Uşaqla uşaq, böyüklə böyük oldu.

Mələk qəlbli gözəl bibim, bu gün daha bir yaşın tamam olur. Yaşın neçə olur, olsun, sən mənim üçün uşaqlığım boyu tələbəlik şəkillərinə heyranlıqla baxdığım uzunkirpik, qaragöz, zərif mələksən. Hərdən mənə elə gəlir ki, gözlərimi bir az qıysam, qanadlarını görə bilərəm. Yaşa, yaz, sevdiklərindən öz şəfqətini əsirgəmə. Səni bərk-bərk qucaqlayıram!

Şamama Quliyeva

Azərbaycandan gedib Moskvada ulduz kimi parlayan, hər tərəfə işıq saçan ULDUZ XANIM sizi təbrik edirəm. Qələminiz həmişə yazar olsun.

Havva Urkayeva

Təbrik edirəm səni Ulduz , hər yaşda belə gözəl , cavan qalasan. Hər kəsə etdiyin yaxşılıqlar həmişə qabağına çıxsın əzizim. Yaradıcılıq uğurların bitib tükənməsin

Düzoba Kitabxanası Telli Güntəkin

Əziz Ulduz xanım ,Uca Yaradanın insan ömrünə bəxş etdiyi ən gözəl nemət olan can sağlığı və uzun ömür nəsibiniz olsun. Təbrik edirəm.!

Mahmudova Nəzifə

Sizi bir də qardaşbalasının gözləri ilə gördük,qəlbi ilə duyduq,sözləri ilə daha çox sevdik,əzizim Ulduz xanım.

Var olun.

Sevənləriniz bol olsun.

Terane Elizade 

Günel xanımın bir qadın kimi də, bir yazar kimi də cəsarəti məni hər zaman təəccübləndirib, amma sən demə təəccüblənməyə dəyməzmiş. Ulduz Qasim kimi cəsarətli, aydın, ürəkli bir bibisi olan necə olmalıydı ki…

Sizi onsuz da sevirdim, amma bu yazıdakı tanımadığım, bilmədiyim Ulduz xanımı daha çox sevdim. Çünki mən sizin yazar tərəfinizi tanıyırdım, xanım, qohum, xala, bibi, insan tərəfinizi Günel xanımın bu şirin, kövrək, həssas yazısıyla tanıdım, sevdim.

Hər zaman parlayın, hər zaman işıq saçın, bizim gözəl Ulduzumuz

QEYD. Başlıqlar "Facebook" sosial şəbəkəsindəki başlıqla eynilik təşkil edir.