Qazaxıstanda təyyarənin qəzaya uğradığı yer necə görünür?

Dekabrın 25-də səhər saatlarında Bakıdan Qroznıya uçan təyyarə Qazaxıstanın Aktau hava limanında qəzaya uğrayıb. Təyyarədə 69 nəfər olub, son məlumatlara görə, qəzadan sonra 32 nəfər sağ qalıb.

Azərbaycan Hava Yollarının “Embraer 190” təyyarəsi Bakıdan Qroznıya uçurdu. O,  Qazaxıstanın Aktau şəhəri yaxınlığında yerə düşüb. 

Qazaxıstan Nəqliyyat Nazirliyinin ilkin məlumatlarına görə, təyyarənin göyərtəsində 5 ekipaj üzvü və 62 sərnişin, o cümlədən 37 Azərbaycan, 16 Rusiya, 6 Qazaxıstan və 3 Qırğızıstan vətəndaşı olub. Aviaşirkət bütün sərnişinlərin adlarını açıqlayıb.

Daha sonra Qazaxıstan Fövqəladə Hallar Nazirliyi təyyarədə 69 nəfərin olduğunu, Mangistau vilayətinin səhiyyə departamentinin mətbuat xidməti isə təyyarənin qəzaya uğraması nəticəsində 10 rusiyalının sağ qaldığını bildirib.

Aviaşirkətdən verilən ilkin məlumata görə, təyyarənin qəzaya uğramasına səbəb təyyarənin quş sürüsü ilə toqquşması olub. Məlumata görə, quş təyyarənin mühərrikinə dəyib, bundan sonra göyərtədə oksigen çəni partlayıb və insanlar huşlarını itirməyə başlayıblar.

Təyyarədə olan 69 nəfərdən ən azı 32-si sağ qalıb, onlardan 27-si, o cümlədən 11 və 16 yaşlı iki uşaq xəstəxanaya aparılıb.

Ekipaj üzvləri arasında sağ qalan yoxdur.

Rusiya prezidenti Vladimir Putin Azərbaycan prezidenti İlham Əliyevə telefonla zəng edərək faciə ilə bağlı başsağlığı verib.

Çeçenistan rəhbəri Ramzan Kadırov və Dağıstanın rəhbəri Sergey Melikov da həlak olan sərnişinlərin yaxınlarına başsağlığı verib.

Qazaxıstan Prezidenti Kasım-Jomart Tokayevin tapşırığı ilə təyyarə qəzasının səbəblərini araşdırmaq üçün dövlət komissiyası yaradılıb.Qazaxıstanın xilasetmə xidmətləri həlak olanların yaxınları üçün qaynar xətt açıb.

Dekabrın 26-sı Azərbaycanda matəm günü elan edilib.