Bəybala Mirzəyev: 

Türkiyəni cəzalandırmaq istəyirlər…

Türkiyənin Quzey İraqda iki gündə 12 şəhid verməsi sıradan bir hadisə deyil. Bu xain addımın arxasından ABŞ-ın, Aİ-nin (Avropa İttifaqı) və İsrailin gövdəsi görünür.

Bölgənin dağlıq ərazilərindəki terror yuvaları neçə illər idi ki, Türkiyə Silahlı Qüvvətləri tərəfindən vaxtaşırı bombalanır, terrorçular davamlı olaraq zərərsizləşdirilirdi. Və son illərdə artıq hamımızda belə bir inam yaranmışdı ki, Şimali İraqdakı terror çətələri demək olar ki, tamamilə darmadağın edilib, bu bölgədəki mağaralar yerlə bir edilib, terrorun mənbəyi, kökü qurudulub.

Lakin 7 oktyabrda Qəzzadan İsrailə, İsraildən isə Gəzzaya hücumların yenidən başlamasından sonra rəsmi Ankaranın olduqca sərt və qəti mövqe ortaya qoyaraq İsrailin fələstinlilərə qarşı “kollektiv cəza” prinsipi ilə apardığı açıq qırğın siyasətini durdurmaq üçün həm siyasi, həm də diplomatik təzyiq rıçaqlarını işə salması ilə durum dəyişdi.

Fələstinin yanında yer alan İspaniya və İrlandiya ilə yanaşı, qəzzalıların kütləvi qətlinə qarşı çıxan Türkiyə də İsraili dəstəkləyən Neocon lobbistlərin, ABŞ-ın və Fransanın liderlik etdiyi Avropa İttifaqının əsas hədəfinə çevrildi.

Bəli, Türkiyənin Qəzzada yaşanan insanlıq dramına qarşı sərt qınayıcı mövqe nümayiş etdirməsi ilə Quzey İraqda 12 türk əsgərinin şəhid olması arasında birbaşa bağlantı var.

İsrail və ABŞ bir-birilə iç-içə bağlı olan bir bütündür. ABŞ-ın Yaxın və Orta Şərqdəki bütün hərəkətləri, planları, əməliyyatları təkcə Birləşmiş Ştatların deyil, həm də İsrailin maraqları üçün icra olunur. Bu mənada, iki gecədə 12 mehmetciyin şəhid edilməsinin gerçək səbəbini ABŞ-İsrail “şifrə”sini oxumadan tam olaraq düzgün anlamaq mümkün deyil.

Bunu İsrail, ABŞ və Aİ tərəfindən Türkiyəyə dolayısı üsulla ünvanlanmış ismarıc kimi, subliminal mesaj kimi, xəbərdarlıq kimi də qəbul etmək olar. İsrail-ABŞ-Aİ üçlüyü qəzzalıların müdafiəsinə qalxan Türkiyəni bu yolla “cəzalandırmaq” qərarına gəliblər. İraq və Suriyadakı PKK-YPG çətələrini yenidən aktivləşdirmək, Türkiyəyə qarşı qısqırtmaq yolunu seçiblər.

“Şeytan üçlüyü”ndən – ABŞ, Aİ və İsraildən belə bir müxənnət davranış zatən gözlənilən idi. Necə deyərlər, ünvan da bəlli, üslub da məlum, hədəf də aydındır. Onlar Türkiyəyə bədəl ödətdirmək istəyirlər. Türkiyəni terrorla dizə gətirəcəklərini planlayıblar. Və bunu başaracaqlarını düşünürlər.

Türkiyə isə şəhidlərinin qanını yerdə qoymayacaq!