Peşəkar Çövkən Liqasında sayca 18-ci olan son turun oyunları keçirilib 

Azərbaycan Respublikası Atçılıq Federasiyasının təşkilatçılığı ilə Binə Atçılıq Mərkəzinin qapalı manejində Peşəkar Çövkən Liqasında sayca 18-ci olan son turun oyunları keçirilib və bununla da cari mövsümə yekun vurulub. 

Turun mərkəzi oyunlarında biri "Sərhədçi" ilə "Embovood" klubu arasında baş tutub. Çempionluğun taleyini həll edən bu qarşılaşma "Sərhədçi"- nin böyük hesablı qələbəsi ilə başa çatıb - 13:0. Bu qələbədən sonra "Sərhədçi" yarış cədvəlində birinciliyi əldə etməklə mövsümün qalibi olub. Yarış cədvəlində ikinci yerin taleyi "Polad"la "Köhlən atlar" klubu arasında baş tutan oyunda həll edilib. Oyunda 12:0 hesabla qalib gələn "Polad" ikinci yeri özünə təmin edib. 

Üçüncü yerin sahibi isə "Zəfər"-"Ağstafa Dilbaz" matçında müəyyənləşib. Görüşdə 5:0 hesabla qalib gələn "Zəfər" yarış cədvəlində ilk üçlüyü tamamlayıb.

Turun digər oyunlarına gəlincə, "Elit" "Şirvan" klubunu 5:0, "Omar" isə "Qarabağ"ı 7:0 hesabla məqlub edib.

Yeri gəlmişkən, PCL-da mövsüm ərzində 10 klub 18 turda üst-üstə 90 oyun keçirib. 

Bir məqamı da qeyd edək ki, 14-24 dekabr günlərində isə eyni məkanda çövkən üzrə ənənəvi Prezident Kuboku-2024 keçiriləcək.

İNTİQAM Məmmədov