Ədalət Tahirzadə:

Dilqəm Əhməd Azərbaycan tarixşünaslığına öz möhürünü basmış çox ciddi alimdir

Aşağıdakı şəkillər 30 aprel 2013-cü ildə mənim mənzilimdə çəkilib. Sevimli dostum, "Şəkinin Milli Qəhrəmanı" Ruslan Rəhim bir dostu ilə bizə gəlmişdi. Dostu da kim olsa yaxşıdır? Dilqəm Əhməd! Söhbətimiz, deyəsən, uzun çəkdi. Özəlliklə tarixlə bağlı düşüncələrimiz az qala üst-üstə düşürdü. Onu bəyəndim, sevdim. O gün özümə etibarlı əqidədaş və YOLdaş tapdığıma çox sevindim. Hər daim bir-birimizin yanında olduq. O, özünü daha çox kolleksiyaçı kimi tanıtmaq istəyir, bu isə, açığı, ağırıma gəlirdi, çünki içində qaynayan elmə, axtarışlara tükənməz həvəsi görür, onun ilk növbədə tarixçi alim kimi yetişməsini arzulayır, yaxın gələcəkdə görkəmli bir tarixçi olacağına ürəkdən inanırdım. Sağ olsun, "qoca dayı"nın tövsiyələrini dinləyirdi. Ona ən önəmli öyüdüm isə siyasətdən uzaq durması idi, çünki siyasətə girişsəydi xərclənəcəyinə əmindim.

Həmin gündən düz 11 il yarım keçir. Artıq Dilqəm Əhməd Azərbaycan tarixşünaslığına öz möhürünü basmış çox ciddi alimdir. Ən önəmli mövzularda yazılmış 10-dan artıq kitabın, yüzlərlə məqalənin müəllifidir. Kolleksiyaçılığı da öz yerində...

...İnsan dünyadan cismən getdikdən sonra o zaman yaşamağa başlayır ki, mənəvi varis(lər)i olsun. Mənim də bu gün bir neçə elə varisim var və onların başında doğma oğlum qədər sevdiyim DİLQƏM ƏHMƏD dayanır. İnanıram ki, mən bu dünyadan köçdükdən sonra Dilqəm Əhməddə yaşayacağam.

Bu gün onun ad günüdür. Özü İstanbulda, mən Bakıda olsaq da qəlbən bir yerdəyik. Onu uzaqdan-uzağa bağrıma basır, yeni yaşını ürəkdən təbrik edirəm!

Əzizim Dilqəm, unutma ki, 40 yaşına girirsən. 40-ın tamamınadək səndən nə istədiyim(iz)i özün gözəl bilirsən. Ağlını başına topla ha! ))